Cristiano Ronaldo chuan Portugal tana a khelhah hattrick vawi 8 a siam tling tawh a, Lithuania chu 5-1 ngawtin an hneh a. European qualifiers-ah chuan goal thun hnem ber a ni tawh a ni.

Thawhleh zana Euro 2020 qualifying an khelhah Portugal chuan 5-1 in Lithuania an hneh a, he inkhelah hian Cristiano Ronaldo chuan goal 4 ngawt mai a thun a. 2016 Euro qualifiers-ah khan hattrick hi a lo siam tawh bawk a, Euro qualifiers bikah vawi khat aia tam hattrick siam thei 14-na a ni.

Tuna inkhelh la chawlhsan lo zingah chuan Cristiano hi pangana a ni a, Poland striker Robert Lewandowski chuan 2016 Euro qualifiers-ah vawi khat aia tam hattrick a siam tawh a, Scotland star Steven Fletcher (2016 Euro qualifiers), Russia player Artyom Dzyuba (2016, 2020 Euro qualifiers) leh Isreal player Eran Zahavi (2020 Euro qualifiers) te huangah a awm ve a ni.

2020 Euro qualifiers bikah Cristiano Ronaldo hattrick siam kha hattrick vawi 6-na a ni a, a hmain vawi 5 chu hattrick siam an lo awm tawh a. Euro qualifiers bikah chuan 2000 kum kha hattrick an siam hnem ber tum niin, qualifying khelh a nih chhung khan vawi 16 ngawt chu hattrick an siam hman.

Lithuania nen an inkhelh tum hian Cristiano Ronaldo chuan minute 7-ah penalty atangin goal a thun a, ram leh club tan penalty atangin goal 111 a thun tling ta chiah a. Vytautas Andriuškevicius chuan Lithuania tan goal thunin an si phurh chu a sut ve leh a.

Juventus forward hian second half-ah minute 16 an khel leh hman tihin goal a thun leh a, Portugal chu hma a hruaipui leh a. Minute 4 chauh an khel leh hman tihin goal dang a thun leh a, hattrick chu a siam ta chiah a. Hemi hnuah hian goal khat chu a thun belh leh bawk a ni.

Portugal tan hian Cristiano chuan goal 92 a thun tling ta chiah a. Portugal captain hian Euro qualifying-ah goal 24 a thun tling tawh a, a hmaa Euro qualifying-a goal thun hnem ber record chu a khum a. Ireland striker Robbie Keane khan a hmain record a siam a, goal 23 a thun a, hei hi Cristiano chuan a khum ta a ni.