25 Mar 2019 08:01

inkhel

​EURO Qualifiers: Netherlands lakah Germany an chak

EURO Qualifiers khelh chhunzawm zel a ni a, kum 2014 World Cup champion Germany chuan Netherlands chu Ajax home ground, Amsterdam Arena-ah tlawhin, Germany hi 3-2 in an chak.

Netherlands tan hian Ajax captain naupang tak Matthijs de Ligt leh Manchester United winger hlui Memphis Depay-te chuan goal an khunga, Germany tan Manchster City winger Leroy Sane, Bayern Munich player Serge Gnabry-te bakah Hoffenheim midfielder Nico Schulz-te chuan goal khat theuh an khung.

Netherlands hi Ronald Koeman-a’n a enkawl hnuah an che tha chho hle a, Koeman-a’n a enkawl hnuah Germany hi Netherlands hneh thei team pathumna chauh an ni. Koeman chuan a naute hi 4-3-3 formation-in a rem a, Barcelona keeper Jasper Cillessen chuan si ban nghakin, Daley Blind, Van Dijk, De Ligt, Dumfries-te chu tlar hnungah an intlara, midfield-ah De Roon, Frenkie de Jong leh Wijnaldum-te awmin, hmatawngah Quincy Promes, Depay leh Ryan Babel-te dah an ni.

Germany hian 3-4-1-2 formation an hmanga, Manuel Neuer chuan si ban nghakin, defence-ah Antonio Rudiger, Sule leh Ginter-te awmin an hmaah Toni Kroos leh Kimmich-te an awm a, wing back-ah Kehrer leh Schulz-te an awm bawk. Hmatawngah Sane leh Gnabry-te inkawpin an hnung chiahah Leon Goretzka dah a ni bawk.

Nikum World Cup semi-finalist Belgium pawh inlanin, anni hian Cyprus an tlawha, Belgium hi si hnih faiin an chak a, Chelsea player pahnih Eden Hazard leh Michy Batshuayi-te chuan goal an khung. Kum 28 mi Hazard hian Belgium tan game 100 a khel tling ta chiaha, goal 30 a khung tawh.

Inkhel dangah Slovenia leh Macedonia-te chu 1-1 in an inhnehtawka, Poland chuan Latvia lo mikhualin, 2-0 in an lo hneh bakah Northern Ireland chuan Belarus chu 2-1 in an  hneh bawk a ni.