​EURO Qualifiers: Italy leh Spain an chak

24th March 2019, 03:03PM

EURO Qualifiers khelh chhunzawm zel a ni a, Europe team hrawl pahnih Italy leh Spain inlanin, hnehna an chang ve ve.

Italy hian Finland an lo mikhuala, Italy hi si hnih faiin an chak. Nicolo Barella leh Juventus striker naupang Moise Kean-te chuan Italy tan hian goal an khung.

Italy hian 4-2-3-1 formation an hmanga, hmatawngah Borussia Dortmund striker hlui Ciro Immobile chu maltlat tir niin, a hnung chiahah goal khungtu Barella dah a ni a, a sirah Juventus player pahnih Federico Bernardeschi leh Kean-te dah an ni. Midfield-ah Chelsea player Jorginho leh PSG midfielder Marco Verratti-te an inkawpa, tlar hnungah Piccini, Leonardo Bonucci, Giorgio Chiellini leh Biraghi-te in tlarin AC Milan goalkeeper Gianluigi Donnarumma chuan si ban a nghak.

Spain chuan Mestalla-ah Norway an lo mikhual ve thunga, Spain hi 2-1 in an chak. Spain tan hian Rodrigo leh defender goal khung thei Sergio Ramos-te chuan goal an khunga, Ramos-a goal hi penalty spot atanga a thun niin, tun season-ah ram leh club tan goal 16 a khung tling tawh. Norway hian penalty an hmu ve bawka, penalty spot atang hian Bournmouth player Joshua King chuan goal a khung ve bawk.

Spain coach Luis Enrique chuan a naute chu 4-3-3 formation in a rem a, Manchester United keeper David De Gea chu si ban nghah tir a ni. Tlar hnungah Jesus Navas, Ramos, Inigo Martinez leh Jordi Alba-te an inkawpa, midfield-ah Dani Parejo, Sergio Busquets leh Ceballos te an ding bawk. Tlar hmaah Enrique chuan Alvaro Morata chu hma a hruai tira, a sirah Marco Asensio leh Rodrigo-ten a sirah an thlawp.

Inkhel dangah Sweden chuan Romania mikhualin Sweden hi 2-1 in an chaka, Greece chuan Leichtenstein tlawhin, Greece hi si hnih faia an chak bakah Bosnia and Herzegovina chuan Armenia chu 2-1 in an hneh ve bawk a ni.

Copyright © inkhel.com 2024. All rights reserved.