Euro 2024 khelh a ni tep tawh, tun season a zo ang a, Euro tan a ni chho nghal mai dawn.
Tun thla hi Euro khel tur tan chuan inbuatsaihna vawrtawp a ni chho ta a, player thenkhat chu ram tan koh thar an ni nawlh nawlh mai.
Kumin Euro-ah hian inhliam avang leh qualify loh avanga Euro khel thei lo tur, player langsar tak tak an awm nual a, chung zinga thenkhat tarlang ila.
Thibaut Courtois
Belgium vice-captain Courtois hian ram tan game 100 a khel tling tawh a, 2022 World Cup-ah khan a game 100-na a khel. Tun season tir lamah khup hliam avangin a buai nghal, rei tak a chawl.
Tun hnaiah Real Madrid goalkeeper hian training a nei chho leh a, beisei sang tak nena lo kir a tum leh mek laiin, a khup a tihliam leh a, hei vang hian Euro pawh a khel thei dawn ta lo nia report a ni.
David Alaba
Real Madrid chuan an tlarhnung lamah player pawimawh pathum inhliam an nei, Eder Militao pawh khup hliam a ni bawk a, David Alaba hian nikum December thla khan a khup a tihliam ve bawk a nih kha.
Krismas hma khan hlawhtling taka zai a ni a, mahse a lo kir leh nghal zung zung thei bik si lo. Kum 31 mi Austria captain hian kumin Euro-ah a team a ho thei dawn lo nia report a ni.
Alaba tel loin Ralf Rangnick leh a pawlte chuan friendly match-ah khan Slovakia an hneh a, kumin Euro-ah hian France leh Netherlands te nen group khatah an awm.
Erling Haaland
Haaland hi chu inhliam vang ni loin, an qualify loh avangin Euro 2024 a khel thei dawn lo. Man City goal khung khawl hian Norway tan game 30 khel tawhin goal 27 a khung tling tawh.
Club lamah chuan chetha viau mah se, ram tan erawh a team te a chakpui hleithei lo. 2022 World Cup an qualify loh hnuah Euro an khel thei lo leh dawn bawk.
Haaland hian Euro qualifying round-ah khan goal 15 a khung tling a, mahse Netherlands leh Turkey te hnungah an awm a, an tla ta a ni.
Viktor Gyokeres
Club tan chetha viau mah se, Viktor Gyokeres chuan a ram Sweden chu Euro 2024-ah a qualify pui thei lo hlauh mai.
Gyokeres hian Sporting CP tan tun season chu a khel tha rem rem hle, game 39 atangin goal 36 lai a khung. English club lian Arsenal chuan nipui bazar inhawn hunah lak luh tumin hma an la mek.
World Cup 2022 play-off ah khan an chak loh avangin Qatar an kal thei ta lo kha a ni a, kumin Euro khel tur pawhin an inhlangkai zo ta lo bawk a ni.
Gavi
Barcelona midfielder hi a inhliam rei ta ngar ngar khawp mai, Gavi hi 2022 World Cup-ah a inlan theih loh hnuin, kumin Euro-ah khup hliam avangin an inlan thei dawn lo.
Kum 19 chauh a la ni a, ram tan game 27 lai a khel tling tawh. Euro qualifier match-a Norway leh Cyprus an hmachhawn tumin goal pawimawh a khung.
Mahse November thlaa Georgia an hmachhawn tumin a khup a tihliam palh hlauh mai a, season thar atang chauhin a inkhel leh thei dawn a ni.
Paul Pogba
Pogba hian inhliam avangin World Cup 2022 kha a khel thei lo a nih kha, tunah erawh hrem a nih avangin Euro 24 a khel thei dawn lo.
Anti-doping dan a bawhchhiat avangin Pogba hi kum 4 chhung inkhel thei lo tura hrem a ni a, hei hi Pogba chuan a la na khawp mai.
Sawmna : Website advertisement hi min click sak ve thin turin kan sawm a che u.
A eizawnna kawng zawh chhunzawm leh chu a duhthusam ber a ni a, an hremna hi khin a tum thu a sawi tawh a nih kha. A hlawhtling dawn nge dawn lo tih erawh sawi lawk theih a ni lo.