Cristiano Ronaldo chu Euro 2024 qualifying khel tur Portugal squad-ah koh a ni leh dawn, Portugal hian Liechtenstein leh Iceland te an hmachhawn dawn a ni.

Kum 38 mi Al Nassr forward hian ram tana inkhelh a la tum zel a, 2022 World Cup-ah khan inlanin, quarter final an paltlang zo ta lo a nih kha.

Manchester United forward hlui hi Saudi league lamah khel tawh mah se, an coach-in a la iai lo a, ram tana khel leh turin a ko leh dawn ta a ni.

Ronaldo hian ram tan game 196 a khel tawh a, Kuwait player Al-Mutawa nen ram tana inlan tam ber an ni mek. Al-Mutawa hian kar leh ninganiah Philippines an hmachhawn dawn a, hemini hian Portugal pawhin Liechtenstein an hmachhawn ve bawk dawn a ni.

Ronaldo hian Portugal team-ah coach 5 a hrawn dawn ta a, Luiz Felipe Scolari, Carlos Queiroz, Paulo Bento leh Fernando Santos te a lo hrawn tawh a.

January thla khan Roberto Martinez chu Portugal coach atan rawih tan a ni a, ani hian Ronaldo chu a be nghal vat a, ram tana inkhelh a la inhuam leh inhuam loh a zawt, Ronaldo chuan rang takin a inpeih reng thu a hrilh a ni.

Belgium coach hlui Martinez chuan, "National team-a khel thei tur tunah hian kan ngaihven mek a, player zawng zawng te chu hun remchang siam sak vek ka tum dawn a ni, chung zingah chuan Cristiano pawh a tel a ni.

"Ronaldo kan zinga a lo tel thei tur hi ka hlim hle. Ram team tana thil tha ber tur kan ngaihtuah dawn a ni," tiin a sawi.

Ronaldo hian Al Nassr tan game 9 khel tawhin, goal 8 a khung leh tawh a, Saudi Pro League-ah pahnihna an ni mek.