Europe khawmualpuia football khelh thiam zual ram te chu title lak tumin an inel chho tan tawh dawn a, ram hrang hrangah hian player lar tak tak an awm teuh hlawm a ni.

Ram hrang hrangte chuan an ram aiawha feh chhuak tur hian khawvel hmun hrang hranga inkhel thin footballer te chu an ko khawm a, hetianga an koh zingah hian khawvel huapa lar te pawh an awm nuk a. Tun tum inelnaa tel tur team te player neih zawng zawng hlutna belh khawma hlu zual kan bih chiang dawn a ni.

Nipui transfer window inhawn chhungin club hrang hrangte chuan player lei leh hralh an buaipui leh ang a, mahni player neih lai te chu an man an bithliah fel leh hlawm dawn a. Thiamna inchen lo tak tak, kum pawh inang lo deuh deuh an ni hlawm a, hei vang hian hlutna inthlau tak tak pawh an tam leh dawn a. Tuna team hlutna belh khawm chungchangah hian club lamin an player te hlutna an ruat fel chu tehfung atana hman tur a ni.

1. Portugal : €872.5 million
European champion ni mek Portugal chu Euro 2016 title an lak hnuah khan an insiam that belh nasa tawh hle a. Player tha deuh deuh an kawl teuh a, anni hi tun tournament-ah pawh hian champion thei tura rin kai ber pawl an ni.

Portugal squad hlutna belh khawm chu €872.5 million niin an sawi a, an team-ah hian Manchester Unitd midfielder Bruno Fernandes chu a mi mal anga hlu ber a ni a. Tun dinhmunah Fernandes hlutna hi €90 million vel niin an chhut a, Atletico Madrid attacker Joao Felix hlutna pawh a theuneu lo viau a, €80 million man niin an chhut.

Premier League Player of the Year Ruben Dias chu pathumna dinhmunah a ding a, a hlutna nia an chhut hi €75 million a ni a. Kum 36 mi Cristiano Ronaldo chu an team zinga player hlut lamah parukna niin, €45 million man niin an chhut a ni.

2. Spain : €906 million
Tun hnaiah Spain hi tournament lianah an che fuh lo thei hle a, beisei an pha lo deuh zel mai a. 2014 FIFA World Cup ah khan group stage an pal tlang thei lo a, Euro 2016 ah khan round of 16 an pel thei lo bawk a. La Roja hi 2018 World Cup ah pawh khan beisei angin an che tha lo a, round of 16 aia sang an thleng thei ta lo.

Beisei angin thleng sang lo thin mah se Euro 2020 khel tura tling zingah chuan squad nei tha pawl tak an ni a. Atletico Madrid midfielder Marcos Llorente chu tun dinhmunah an ram aiawha feh chhuak zingah chuan hlu ber a ni mek a, a man chu €80 million vela chhut a ni.

Real Sociedad winger Mikel Oyarzabal, Manchester City holding midfielder Rodri leh Barcelona rawlthar Pedri te hlutna chu a inang hlawm a, €70 million man niin an chhut a. Player 12 vel bawr chu €40 million a hlu niin an chhut a. Koke, Ferran Torres leh Pau Torres te hlutna pawh €50 million niin an chhut bawk a ni.

3. Germany : €936.5 million
Beisei anga che tha lo zinga sawi tel loh theih loh chu Germany hi an ni a, anni pawh Spain ang deuhin rin aiin an thleng sang lo leh thin a. Die Mannschaft hian player chu an nei tha viau thung a, world-class footballer eng emaw zat an kawl mek a ni.

Bayern Munich midfielder Joshua Kimmich chu Joachim Low kaihhruai team ah hian man to ber a ni a, a man chu €90 million niin an chhut a. Central midfielder Leon Goretzka chu hlu ber dawttu a ni a, a hlutna hi €70 million a ni a. Winger Serge Gnabry leh attacking midfielder Kai Havertz te hlutna pawh €70 million man niin an sawi bawk.

Timo Werner leh Leroy Sane te chu hlutna sang deuh hlek zingah an lang pha bawk a, Werner hlutna hi €65 million niin an chhut a, Sane hlutna chu €60 million niin an chhut a. Player an nei tha bawk a, Germany chu team hlauhawm ber pawl an nih ngei a rinawm.

4. France : €1.03 billion
World champion ni mek France hi Euro 2020 title la thei tura rin kai zual zingah an tel a, Didier Deschamps kaihhruaina hnuaiah player pawh an tha hlawm hle a. 2018 World Cup trophy latute kha a tam zawk chu an la tel a, an vanglai tak a ni chho mek hlawm nghe nghe a ni.

Kylian Mbappe chu Les Bleus player zinga hlu ber niin, kum 22 im hlutna hi €160 million zet a ni a. A hlu ber dawttu chu Real Madrid centre-back Raphael Varane niin, a hlutna hi €70 million niin an chhut a, kumin nipui transfer window inhawn laiin Real Madrid a chhuahsan dawn niin an sawi.

Bayern Munich winger Kingsley Coman chu €65 million a hlu niin an chhut a, Manchester United midfielder Paul Pogba, Barcelona forward Antoine Griezmann leh Sevilla centre-back Jules Kounde te hlutna chu €60 million niin an chhut a. N’Golo Kante hlutna chu €55 million niin, Ousmane Dembele hlutna chu €50 million a ni bawk.

5. England : €1.27 billion
Euro 2020 khel turah chuan England chu player nei naupang ber niin an sawi a, chutih rual chuan an squad hlutna pawh a sang ber bawk a. Three Lions hian player an nei thalai seng sawng hle a, ‘Golden Generation’ han tih em tur chu ni lo mah se an lakah erawh beiseina an nei sang hle.

England captain leh centre-forward Harry Kane chu an player zinga hlu ber niin, a hlutna hi €120 million vel zet a ni a. Borussia Dortmund winger Jadon Sancho pawh €100 million a hlu niin, a hnuai chiahah hian Manchester City player Raheem Sterling a awm a, a hlutna hi €90 million a ni.

Manchester United forward Marcus Rashford hlutna chu €85 million niin, Phil Foden chu €80 million a hlu a ni bawk a. England hian €50 million aia hlu hi player 10 vel zet an nei a ni.