15 Nov 2019 09:00

bakteaJr.

Mizo tlangval

​Euro 2020 khel tur England

England chuan 2020 Euro Qualifiers inkhelah Montenegro chu Wembley Stadium-ah an lo mikhuala, England hian 7-0 laia hnehna changin nakkuma khelh tur Euro-ah an inpet tling.

Group A inkhelah hian Alex Oxlade-Chamberlain chuan goal hmasa ber a khunga, Tottenham striker Harry Kane chuan hattrick siamin, Manchester United forward Marcus Rashford pawhin goal khat a khunga, Chelsea striker tunlai che tha tak Tammy Abraham chuan England senior team tana a goal hmasa ber a khung bawk. Montenegro player Aleksandar Sofranac chuan 66mins-ah an lamah a ti lut palh bawk.

Group A-ah hian England leh Montenegro bakah Czech Republic, Kosovo leh Bulgaria-te an awm bawka, England hian khelh 7 atangin point 18 hlawhchhuak tawhin hmahruaitu an ni a, khelh khat la hmabak chungin Euro khel tur hian an inpet tling.

England captain Harry Kane chuan a ram tan hian goal 31 a khung tling ta a, England tana goal khung hnem ber parukna a ni. Leicester City leftback Ben Chilwell chu khel tha lehpek hle in, assist pathum lai a nei a, chance pawh inkhel zingah a siam chhuak hnem ber.

England hian an game 1000-na khelin a vawi 10 nan Euro khel turin an inpet tlinga, kum 1987 hnuah a vawi khat nan Wembley-ah goal 7 an khung tling leh a ni.

England 7-0 Montenegro

(Chamberlain 11’, Kane 18’, 24’, 37’, Rashford 30’, Sofranac 66’OG, Abraham 84’)

Shots: 17-6

Pass accuracy: 91%-79%

Chances created: 12-4

Possession: 66%-34%