07 Jul 2018 11:34

Inkhel

Mizo Sports Website hmasa ber

​Euro 2018 a intan ta

Uruguay leh Brazil an tlak takah chuan, FIFA World Cup 2018 ah chuan Europe ram paruk chiah an dam ta - Euro 2018 a ni tawh mai!!

FRENCH REVOLUTION

Uruguay khan France kha hneh tur angin an lang lo hrim hrim a, French coach Didier Deschamps khan 'chak loh pumpelh' tumin risk la duh miah loin team a rem khawm a, an chak ta ngei a ni.

Football khawvela attacking player hmuhnawm ber pawl pahnih Mbappe leh Griezmann-te kawl mah se a 'innghahna' chu a tlar hnung pali leh an hma chiaha 'ball winner' pahnih Kante leh Pogba-te an ni a - tlar hnung rem phui hmasak a, a rem huna nawr an tum a, an hlawhtling.

Set piece atangin Varane hmangin goal an thun a, chutah vanneih goal an nei zui bawk. Danglamna chu keeper pahnih kha an ni thung a, France keeper Lloris-a'n goal ngei tura rin a dang a, Uruguay keeper Muslera-in goal lo tura rin a chhuah thung - kha mi hnu kha chuan France khan him takin an khel a, hmuhnawm tak ni lem lo mah se nuamsa takin World Cup semi final an lut tlat.

1998 ah tuna an coach Deschamps hian captain niin Paris khawpuiah ngei World Cup trophy a lo lek kang va va tawh. He mi hnu hian talent nei ṭha tak tak nei chungin an champion thei tawh lo. Tuna naupang rualah hian beiseina an nghat a, Deschamps ngeiin a ho bawk nen 'French Revolution' tiin hming lem an vuah hial a ni.

NEYMAR A TLU, BRAZIL AN TLA!

Football khawvela record nei ropui ber, World Cup-a team hlawhtling ber Brazil an tla a, Neymar pawh a tla tel!

Kumin chu a tir lam aṭang tawhin Brazil hi an ropui vak lo. Switzerland an draw bakah Costa Rica hneh turin injury time an mamawh a, talent nei ṭha Belgium hneh loin an tlawm ta.

Brazil tlak chhan leh a dem tur lam sawi dâwn ila, phek tam daih a awm ang; nimahsela Belgium 'Golden Generation' hi kan fak zawk dâwn lo'm ni?

Belgium hi tuna ṭha thut an ni lo. Youth policy mumal tak nen 'vision' neiin football an kalpui a, chuvangin he 'generation' hi an lo chhuak ta a ni. Football club ṭha ber an nei hauh lo a, Champions League lamah Belgian club an ropui vak kan hre ngai lo, Belgian player erawh a hnung bera Courtois aṭanga a hma bera Kevin De Bruyne athlengin talent hlang an ni.

'A hma berah KDB maw?' - ni e, Brazil an hneh ṭum khan KDB kha a laiah a awm a, a hma berah a awm, a sir tawn tawnah Hazard leh Lukaku an awm bawk - he Belgian Super Trio hi thawk khat lai khan Chelsea-ah an awm khawm vek ṭhin kha kan la hria em? Hazard tih lohte hi chuan Chelsea-ah hmun an chang lo a, an chhuak ta a, tunah Brazil pet chhuak khawpin an ṭha tawh si.

Neymar hi khawvela footballer manto ber a ni a, a thiam leh hmelṭhat avanga Brazilian nulate mai ni lo, Mizoram thleng pawha nulate ṭan hlawh a ni a; nimahsela ṭul lo tak taka a 'Neymar' chiam chiam avangin internet khawvela fiamthu thawhna a ni ta mai a, naupang tán entawn tur ṭha lo tak a hnutchhiah zui.

He player talent nei danglam bîk hi Brazilian slum atanga sei lian, nu leh pa thuawih leh a chi puite lawm hlawh tak ni mah se, tun ṭum World Cup zet chu a hmingthan dan a duhawm lo a, a hmingchhe ta hial a ni - football club neitu chu ni ila, ka lei duh viau lawi si ang, football hi a thiam chiang em a sin!

Brazilian aiin KDB leh Eden Hazard khan ball an tlanpui thiam zawk emaw tih tur a ni a, Lukaku kha a chak fál nalh a, Kompany khan tlar hnung a ho khawm ṭha a, Fellaini leh Witsel khan defence hma an hnawh phui tlat. World Cup quarter final khel tura a hma lama bench-a a dah ṭhin Fellaini leh Chadli ring ngamtu coach Martinez fakin awm rawh se.

RANGKACHAK FIAHNA

2014 World Cup ah khan Argentina hneh loin Belgium hi an tla. 'Golden Generation' tih ṭawngkam khan nuihzat a hlawh deuh. Khami ṭuma starting eleven-a player pariat ngawt kha tuna Brazil hnehtu team-ah hian an khel leh ta - Golden Generation an lo ni takzet em?

Belgium chuan 1986 hnua a vawi khatna atan World Cup semi final an lut ta. 1986-a Enzo Scifo, Eric Gerets, Jan Ceulemans etc kha 'The Original Golden Generation' tiin media lam chuan an sawi ta thung - 1986 khan Belgium inkhel kha ka en a, Scifo thiamzia kha naupang té mah ni ila ka la hre chiang hle. Tuna naupangte hian Hazard leh KDB thiam zia hi an hre chiang ve tho ang.

Golden Generation sawi takah chuan Portuguese Golden Generation kha sawi lar ber an ni. Anni kha kum bithliah inelnaah an ropui a, nimahsela European Championship leh World Cup an champion ta si lo a, journalist ṭawngkam hriam deuhte chuan Portugal ho kha, "Silver leh Bronze Generation mai an lo ni e," tiin an sawi zui ta hial.

Tuna Belgium player-te en ila, super star tia sawi theih vek ni lo mah se, Brazilian aia ball thiamte, German tluk zeta chak, African tharum nei, European thluak nei bawk site an nei. An coaching staff ah hian Thierry Henry a awm tih kan hria em? French mihráng, World Cup champion dan hre tawh khan Martinez hi a pui a, Lukaku-te tán chuan ngaih a ṭha ngawt ang.

A pawimawh ber chu a tawpah tunge World Cup trophy hi hawn dâwn, tih a ni - chu mite tluka Golden Generation chu an awm chuang lo ang - rangkachak hlawm nomawi la a, khawvel hnehtu tunge ni dawn le?

- Lalnghinglova Hmar (Tetea)

(He thu ziah lai hian Europe ram paruk an la dam)