16 Nov 2015 01:21

Inkhel

Mizo Sports Website hmasa ber

​Euro 2016 thulh a ni lovang ?

Paris khawpuia misualte pawi khawhna avangin pawi sawilo mi 129 chuan nunna an chan a, mi 350 laiin hliam an tuar bawk. He pawi khawihna hi Islamic State te chuan an tihah an chhal a, an tawpna tur a la nih loh thu an la sawi ta deuh deuh.

Nakkum hian France-ah Euro 2016 khelh a ni dawn, kumin chhungin misual ten vawi hnih lai France-ah hian pawi an khawih tawh. Euro 2016 atan a him lo hle tih a chiang nghal mai, chungte avang chuan Euro 2016 hi France-ah ngah a ni dawn em tih chu Football fans te ngaihven ber a ni mek.

France-a Euro 2016 Tournament organiser Jacques Lambert chuan ,"Terrorist te chuan Euro 2016 thulh theih nan hma an la pawh a ni thei. January thlaa pawi khawihna khan hlauhthawnna a siam tan tawh a, tuna thil thleng hi chuan nasa takin hlauhthawnna a siam ta." tiin French radio Stadion RTL a hrilh a.

January thla khan Islamist silai kengte chuan Charlie Hebdo mi leh sa, Jewish supermarket leh police pakhat telin mi 18 an that a, kar hmasa zirtawp zana thil thleng rapthlak tak kha a vawi hnihna a ni a. Jacques Lambert chuan,"Engpawh nise Euro 2016 khelh a nih theih nan venhimna tha thei ang ber kan ngaihtuah a ngai a ni.

"Stadium chhunga security chu a tha khawp mai, mahse kawng dunga mipui punkhawmna erawh hlauhawm a la ni," tiin a sawi.

Euro 2016 final hi July ni 10, 2016-ah Stade de France-ah khelh a ni dawn a, ni 13 zana France leh Germany te inkhelh laia pawi khawihna pakhat kha he stadium bul deuh lawkah hian a ni nghe nghe bawk. He pawikhawihna avang hian sports fixtures thenkhat sawn a ni nual bawk a ni.

picture credit : Reuters