Tottenham chuan Premier League inkhelah Brighton chu 1-0 in an hneh a, goal khungtu hi Dane playmaker Christian Eriksen a ni.

Kum 27 mi hian 88mins-ah box pawn atangin a pet goal a, Tottenham chu pathumnaah chhovin, season tharah Champions League an khelh leh ngei a rinawm zual hle.

Eriksen hian season khat dang bak Tottenham-ah contract a nei tawh lova, Spurs nen contract thar chungchangah inremna nei hleithei lo mahse manager Mauricio Pochettino chuan Eriksen chu contract thar a ziah ngei a beisei thu a sawi.

Pochettino chuan, “Kan hma hun lo awm zel turah Eriksen hi kan hnenah awm zel turin ka duh em em a, a awm zel pawh ka beisei. Keimahni nen inbe turin Eriksen hi a inhawng a, eng nge thleng zel dawn erawh sawi lawk theih a ni lo.

“Eriksen hi mi bik a ni a, player dang nise contract thar chungchanga kan biak hun a danglam maithei. Season a tawp tep tawh a, nakinah hemi chungchang hi chu sawina hun a la tam dawn a, tunah chuan Eriksen-a tan chauh pawh ni lovin player zawng zawngte hi kan season hman mekah an rilru an pek a pawimawh ber a ni,” a ti.

Tun season kal mekah Eriksen hian Tottenham tan goal 8 khung tawhin assist 17 a nei tawh a, Spurs tan hian Premier League game 202 khel tawhin, goal 47 a khung tawh a, assist 60 lai a nei tawh bawk a ni.