Tottenham defender Eric Dier chuan medical nei turin Bayern Munich a thleng tawh a, medical a paltlang chuan reilote chhungin Bayern Munich chuan thuchhuah an rawn siam vat dawn a ni.

Bayern Munich chuan central defender an ngaihven nasa a, Spurs defender hian an hnena medical nei tura a lo zin thu Ningani khan Thomas Tuchel chuan a sawi chiang.

Kum 29 mi Dier hian Spurs-ah thla ruk chiah contract a nei tawh a, tunah hian club hrang hrang tan biak theih niin, pre-contract pawh a ziak thei tawh.

"Ka thil tawn tawh atangin, a tawp dawn tak takah duhthusam loh thil a thleng ve thei.

"Dier chu tunah hian kan hnenah a awm mek a, lak luh tumin hma kan la mek. A contract chungchang pawh kan sawi ho chho mek a ni," tiin Bayern Munich boss Thomas Tuchel chuan a sawi.

Nikum September thla khan Bayern Munich chuan Fulham midfielder Joao Palhinha lak luh tumin hma an la a, mahse a tawp dawn tak takah a tlawlh ta a nih kha.

Tottenham chuan Radu Dragusin chu Genoa atangin an la lut dawn a, inremna pawh club pahnihin an nei fel tawh. Tin, Djed Spence pawh Italian club-ah loan-in an chhuahtir bawk.

Dier hian tun season-ah chhungin Spurs-ah hmun a chang tlem ta hle, competition hrang hrangah Spurs tan game 4 chiah a khel a, Dragusin an lak luh phei chuan Dier-a tan chuan inkhelhna hmun a awm tawh dawn lo a ni.