LeBron James chuan inkhel entu awm miah loa inkhelh chu a duh loh thu sawiin, chutiang hun a thleng dawn a nih chuan khelh loh a thlang tih a sawi.

Tun hnaiah khawvel hmun hrang hrangah coronavirus chu a darh mek zel a, United States huam chhungah pawh mi 300 chu he natna hi kai tawh tih finfiah an ni a, mi 17 zet chuan nunna an chan phah tawh bawk a ni.

China ram atanga coronavirus darh mek avang hian khawvel ram hrang hrangte an ralkhel hle a, infiamna chi hrang hrangah pawh harsatna a thlen mek bawk a. NBA game pawh inkhel entu awm miah loa khelh a ngai maithei niin tun hnaiah khan thuneitute chuan an ngaihtuah a ni.

Heti taka mi an ralkhel lai hian LeBron James chuan inkhel entu awm loa inkhelh chu a duh loh thu a lo sawi ve thung a ni.

Los Angeles Lakers star chuan, “Inkhel entu awm miah loin kan inkhel ang a maw? Thil theih a ni lo,” a ti.

“Kei chuan chutiangah chuan ka khel dawn lo a. Min ngaisangtute an awm loh chuan inkhelh ka tum lo a, anni tana inkhel hi ka ni asin. Ka teammate te tan bakah min tantute tana khel ka ni a, chu aia pawimawh chu a awm lo,” a ti bawk.

A sawi zelnaah, “Arena kan thleng ang a, entu mipui tu mah an awm lo a nih chuan kei chuan ka khel lo nghal dawn a. An duh duhin lo ti se, kei chuan khelh ka tum lo bur mai a. Ka inkhelh tan tirh atangin entu awm lohnaah hian vawi khat mah ka la khel lo a, khelh pawh ka tum chhin lo,” a ti.

“Helai hi Europe a ni lo a, kei chuan engah mah ka ngai lo,” tiin James chuan a sawi bawk a ni.

Boston Celtics guard Kemba Walker pawhin entu awm loa inkhelh chu ngai lo hram se a tih thu a sawi ve bawk a. LeBron James-a teammate Alex Caruso erawh chuan fimkhur thuhlaa chutiang hun a thleng a nih chuan a hriatthiam tur thu a sawi ve thung a ni.