Premier League-ah khelh 92 a la awma, tunah hian April thla tir lam thleng chu coronavirus avangin Premier League hi suspend rih a ni.
Thawhlehni lam khan UEFA chuan thuchhuah siamin, kumina neih tura tih Euro chu nakkuma an sawn thu an puanga, Europe-a league hrang hrang te chun June thlaa season zo hman turin an ti bawk.
Premier League chhunzawm dan turah thu chiang eng mah a la awm lova, Ningani hian UEFA thutlukna zulzuiin Premier League club te chuan season khelh zawh a nih dan tur an rel dawna, tunkar tawp hian thuchiang a awm theih a rinawm.
Football lam journalist leh te expert te rin dan chuan Premier League-a khelh hmabak game 92 te hi entu mipui awm lova khelh zawh a nih hmela, TV lamah erawh live-a chhuah zel a nih a rinawm.
Zin kual tam a ngaih loh nan game khelh hmabak te chu neutral ground (tu home mah nilo) a khelh a nih ringtu pawh an tam hle a, khawi hmun atang pawha pan awlsam lai bera khelh a nih a rinawm a, chu bakah ni khat chhungin stadium pakhatah game khat aia tam khelh a nih mai pawh a rinawm viaua, ni thum danah club pakhatin game an khelh pawh a ngai dawn niin a lang.
Heti anga game khat aia tam stadium pakhata ni khat chhunga khelh hi vengtu police te bakah staff hrang hrang te leh a inkhelin a kaihhnawih zawng zawng te tan veivah a ngaih tlem nan leh a buaithlak loh ber dan tura tih a ni dawn niin chanchinbu mite chuan an tarlang.