15 Jul 2019 12:40

Inkhel

Mizo Sports Website hmasa ber

2019 Wimbledon mipa champion Novak Djokovic

Darkar 5 dawn (4hrs and 57 mins) an khelh hnuah chak zawk kan hre thei ta chauh, Wimbledon mipa final ropui leh hmuhnawm takah Djokovic chuan chu 7-6, 1-6, 7-6, 4-6, 13-12(7-3) in Roger Federer a hneh a, 2019 Wimbledon champion a ni ta a ni.

Final Set Tie Breaker hmanga chak zawk zawnna hmasa ber match-ah hian Federer hian Championship Point vawi 2 ngawt a nei hman a. Djokovic cool takin a rawn comeback, a va pui miah miah em aw! 2008 Wimbledon Final-a Nadal leh Federer-te in hmachhawn aia a nep na a awm chuang awm love.

Novak hian Wimbledon Nomawi vawi 5 a chawi ta a, Grand Slam 16 a la ta bawk. Federer hian Novak hi Wimbledon final-ah vawi 3 a hmachhawn hnu pawhin a la hneh thei ta chuang lo. Kum 2014, 2015 leh 2019 te khan player ropui pahnih hi Wimbledon final-ah an lo inhmachhawn tawh a ni.

Engtin nge Novak khan Federer kha a hneh theih?

Kan hriat theuh angin Grass court-ah hi chuan service tha nei tan chance a tha. An service a nat chuan surface dang ang lo takin a kal chak em em a. Chuvang chuan Ace pawh a tam a, rally pawh a tlem phah thin reng a ni.

Novak Djokovic fin zia kan hmu chiang hle, Wimbledon-a a service that vanga Ace tam ber record siam theitu Federer a hmachhawn tih a hrechiang, chuvangin a fimkhur a; defensive pawh a hunah a khel thiam hle.

1st set: A service a break thei dawn lo tih a in hre chiang hle. Break chu sawi loh, Federer kha a ace nasain; a service atangin point a hmu ngun hle bawk. Chumi avang chuan Novak hian a service hloh lova; tie break hnuhluh phet a tum ta char char. Open play-ah a Backhand, forehand leh a defensive that tawk zia a lang chiang a, Novak thluak hman a fuh hle! Tie Break-ah chuan a la ta nge nge.

2nd Set: Novak serve a chhe em em a, Federer in a break sak a, 3-0 in a lead ta mai. Djokovic hian beisei a nei lo nghal a tih theih. La hah lutuk lo Federer break theih loh tluk tih a chiang. Set 2 na chu a tang lo lui emni? Tih theih tur khawpin point a hloh nasa. A tha khawl a; tha sen hnem loh a tum a, set a hloh chiang hle. Hetianga set hloh luih hi Tennis term-ah chuan 'Tanking' an ti. Nimahsela, lak loh luih ngat ngat ang chi game an play a nih erawh chuan hrem theih an ni.

3rd set: Hei pawh hi first set ang chiah niin, tie break-ah a hnuklut leh, a ti fuh leh tak zet.

4th set: Novak-a'n chance a zawng, break-na chance a zawng chho zel. Federer a chau tawh niin a hria a, Federer serve pawh a theih chen chenah lak a; baseline-a thlen ngat ngat a tum char char a. Tum khat chu a ti fuh nghe nghe. Nimahsela Federer serve tha leh khel tha bawk si chu a dal zo bik lo.

5th set: Novak hian break a tum nasa, a chau tawh a, baseline-a ball pek ngat ngat a; open play-a point hmuh zel a tum. An in-break zak zak, Federer serve a tha fal chhunzawm zel. Vawi 10 chuang daih 5th set-ah pawh hian a ace nghe nghe. Djokovic erawhin ace vawi 5 pawh a nei tling lo. Chutah a tawpah 12-12 ah Tie break loh theihloh khelh a ngai, Djokovic bawk a chungnung leh ta a ni.

Tie break hi sawi nep theih a nih loh zia leh inhnehtawkte tana decider tha a nih zia a lang chiang awm e. Novak Djokovic fing lutuk kha a ropui in a fakawm hle mai.