He zawhna hi a tam hle a, a chhan chu Erling Haaland hian season chawhma lam khan Red Bull Salzburg tan UEFA Champions League a lo khel tawha, goal 8 a khung nghe nghe a, mahse Haaland hian January thla khan Salzburg chhuahsanin Borussia Dortmund a zawm.

A hmaa UEFA kaldan chuan Haaland hi Dortmund tan Champions League khel thei lo tur ni mahse Round of 16 inkhelah Haaland hi Dortmund tan khelin goal hnih lai a khunga, PSG lakah a club a chakpui nghe nghe.

Champions League leh Europa League-ah te hian a hma chuan player pakhat in season khat chhungin club pahnih ai a awh thei lo reng thina, mahse he dan hi UEFA chuan a thiat tawh.

Kum 2018 March thla khan UEFA chuan he dan hi a thiah thu an puanga, hemi a nih avang hian January-a club in player an lak luh in an club thar te tan an khel thei tawh.

Champions League group stage a zawh hnu hian Round of 16 lut te chuan February thlaah squad list thar an thehluh a ngai a, hetah hian group stage-a an dah loh hming thar pathum an dah theia, an player lei thar te chu season chawhma lama club dang tana Champions League lo khel tawh pawh nise dah theih an ni tawh.

Club-in player pathum aia tam January thlaah a lalut a nih erawh chuan player pathum chiah ziah luh thar theih a nih avangin pathum bak chuan an chhawr thei dawn chuang lo tihna a ni a, club in a duh pathum a dah thei.

Heti ang a nih avang hian Dortmund chuan Haaland hi an chhawr theia, Tottenham pawhin an player thar Steven Bergwijn chu Champions League-ah an chhawr thei dawna, Manchester United pawhin Europa League lamah Bruno Fernandes chu an chhawr thei dawn a ni.