30 Jul 2020 10:43

bakteaJr.

Mizo tlangval

Engtik hunah pawh inhnek turin Joshua a inpeih: Hearn

Boxing promoter Eddie Hearn chuan Anthony Joshua chu khawihah pawh, eng hunah pawh inhnek tura a inpeih thu a sawi.

AJ-a inhnek hnuhnung ber hi nikum December thla kha a ni a, hetah hian a hma chiaha a title lo hloh tawhna Andy Ruiz-a lakah hnehna changin, a heavyweight title te a la let leh.

AJ hian tunah hian fight pahnih atan inremna a nei meka, Kubrat Pulev leh Tyson Fury te hmachhawn tur a ni. Pulev nen hian thla hmasa khan inhnek tur ni mahse coronavirus avangin sawn hlat a ni a, an inhnek hun tur a la hriat loh.

Hearn hian tunah hian coronavirus avanga boxing a chawlh rih avangin, a inah ring a daha, hetah hian Fight Camp buatsaih a tum nghe nghe a, a tul phawt chuan AJ pawh a inhnek hreh loh thu a sawi.

Hearn chuan, “Ka inah pawh hian Joshua hian inhnek a hreh lova, mipui awm lova a inhnek a ngai a nih pawhin kan kal tlangpui tho ang. Ka huanah hian training a rawn bei ngawrh em em a, chuvang chuan heta inhnek pawh hi a tan buaina tur a awm dawn lo.

“Kar hnih liamta mai pawh khan a rawn kala, insual hi nuam a ti a, inhnek nuam a ti bawka, hmun ropui tak tak Wembley Stadium, Madison Square Garden ah te chauh inhnek lam a ni lova, boxing lam a ni zawk. Mipui hmaah inhnek thei ngei se chu kan duh bera, mahse a career leh a hmasawn zel nan kuminah a inhnek ngei ngei a ngai,” a ti.

Hearn chuan AJ leh Pulev te chu kumina an inhnek ngei a rin thu sawi zuiin, “Fighter te hian a theih anga tam pawisa hlawhchhuah te chu an duh ngei a, mahse fighter anga hma an sawn pawh a ngai tela, Kubrat Pulev nena an inhnek tur pawh hi a hmuhnawm dawnin ka hria a, Joshua-a tan pawh a hautak dawna, kuminah an inhnek ngei erawh ka beisei a ni,” a ti bawk.