Pathianni zan khan Liverpool chuan Carabao Cup an chawi leh a, an trophy room-ah dah belh tur pakhat an neih belh leh ta.

English club khawvel pum huapa lar tak tak an awm, trophy an lak tam dan thlir ho ta ila.

World War II hma kha chuan Aston Villa an ropui hle, major trophy 12 lai an la hman a, Blackburn Rovers chuan dawtin, trophy 8 an la. Sunderland, Arsenal, Everton, Newcastle United leh Steffield Wednesday te chuan major trophy 7 theuh an la bawk.

World War II zawhah Liverpool an bawn hle, major trophy 42 lai an la a, Manchester United chuan dawtin, trophy 40 an la. Chelsea (25), Arsenal (23) leh Manchester City (23) ten an dawt.

World War II hma leh hnung, a pumpuiah Liverpool an chungnung ber a, major trophy 46 an chawi. Manchester United chuan an dawt a, anni hian trophy 43 an la a, Arsenal chu pathumna niin, trophy 30 an la a, Manchester City (26) leh Chelsea (25) ten an dawt a ni.

English club zingah, FA Cup, League leh Champions League treble thei club pahnih chiah an awm a, kum 1999 khan Manchester United an treble a, nikum khan an thenawm khaw club Manchester City chu an treble leh bawk a ni.