England head-coach Gareth Southgate chuan Euro 2024 qualifiers khel turin Chelsea midfielder Mason Mount ko mah se, a inhliam avangin Mount hi England squad atangin a inhnukdawk.

Zirtawpni khan Southgate chuan tun thla tawpa Italy leh Ukraine hmachhawn tur England squad a puang a, Mount hi koh tel ni mah se, a international duty a hlenchhuak thei dawn ta lo a ni.

Zanina Chelsea in Premier League inkhela Everton an hmachhawn hunah pawh khan Mount hi a inhliam avangin a inlan thei dawn lova, hliam serious tak a nih loh avangin international break zawhah erawh a inkhelh leh theih tawh a rinawm.

Southgate hian Mount-a hmunruak hnawhkhat tu tur hi a la ko thei a, mahse player a ko belh dawn em tih a la chiang lova, Mount hi a khel ruh bawrah harsatna a nei nia sawi a ni.

Karleh Ningani zanlaiah England hian Italy an tlawh dawna, March ni 26 zanah Ukraine chu Wembley Stadium-ah an lo mikhual leh bawk ang.

Mount hi England U16, U17, U18, U19 leh U21 player hlui a ni a, kum 2019 atang khan England senior team-ah awm tanin, a ram tan kum 24 mi hian game 36 khel tawhin, goal 5 a thun tawh a ni.