Dele Alli chuan England chu khawvela tha ber an nih theih thu sawiin, a team-mate te nen chutiang chu an thlentir theih a rin thu a sawi.

Nikum khan Russia rama FIFA World Cup khelhah England chuan semi final an lut a, Three Lions hi UEFA Nations League group-ah an chak ber bawk a, Spain leh World Cup finalist Croatia te nen an awmho a, tun nipui hunah a vawi khatna atan finals hi an khel dawn a. Semi final-ah Netherlands an hmachhawn ang a, an chak zel a nih chuan Portugal leh Switzerland te inkhela chak zawk zawk chu final-ah an hmachhawn ang.

Alli chuan, “Kan team hian World No. 1 nih theih kan duh hle a, mahse chutiang ni thei tur chuan kan inkhelh apiangin theihtawp tak meuh kan chhuah ziah a tul a. Inthlahdah tak chung chuan eng tikah mah a nih theih dawn lo a, tun atangin kan insan mar a pawimawh ber a ni,” a ti.

“Khawvela tha ber hi kan nih theih ngei kan ring tlat a. A nihna takah chuan tu pawhin ngaihdan kan nei theuh a, keini pawhin ngaihdan nghet hi kan nei ve a ni mai a. Khawvela chungnung ber ni thei tur chuan thawhrimna a pawimawh tih erawh kan hriat thar hmasak a ngai,” a ti bawk.

A sawi zelnaah, “A chungnung ber ni thei tur chuan kan kawng a la thui angreng hle a, hmabak tam tak kan la nei a, hna hautak zet mai kan pal tlang a tul dawn a. Tun dinhmunah chuan hma kan sawn zel a, kawng dik kan zawh chho mek niin kan hria a ni,” a ti.

English midfielder Dele Alli chuan, “Nations League kan la khel leh dawn a, hetah hian team tha tak tak an tel teuh a. Kan group ringawt pawh hi Spain leh Croatia te nen kan awmho a, khirh ve tak mai a ni a. Kan la dam ve zel a, trophy lak theih ngei kan tum dawn a ni,” a ti.

Zirtawpni khan England hian Wembley-ah Czech Republic an hmachhawn a, 5-0 ngawtin an mikhualte hi an lo sawp a. Raheem Sterling chuan hattrick a siam a, penalty hmangin Harry Kane chuan goal khat a thun a, substitute Callum Hudson-Odoi zarah Czech Republic lampang hian anmahni lamah goal khat an thun bawk a ni.