Zanin zan laiah England chuan friendly match-ah Belgium an mikhual dawn a, he inkhelah hian Arsenal midfielder Declan Rice chu England captain a ni dawn tih England head coach Gareth Southgate chuan a sawi.

England hian Belgium hi Wembley Stadium-ah an lo mikhual dawn a, Rice hian England tana a game 50-na a khel dawn a, Harry Kane leh Kyle Walker te an awm lo bawk nen, captain arm band chu a ta a ni dawn a ni.

A ram tana captain arm band a hren tur chungchang sawiin Rice chuan, “Ka game 50-na ka khel dawn a, ka thiante leh ka chhungte hmaah Wembley-ah ka khel dawn a, captain ka ni dawn bawk a, awih a har lek lek zawk. Ka tan a hlu dawn hle a, coach in captain ka nih tur thu min hrilh khan sawi tur pawh ka hre mai lo a ni,” a ti.

Kum 25 mi hi hruaitu tha a ni tih a chiang a, naupang tein West Ham tan Premier League-ah captain arm band a lo hreng fo tawh a, Arsenal a zawm hnuah pawh Arsenal midfield-a player pawimawh ber zinga mi a ni.

Youth level-ah Rice hi Republic of Ireland tan a khel a, senior level-ah pawh Republic of Ireland tan khel hman zet mah se, England tana khelh a tlang leh ta zawk a, England tan hian kum 2019 atang khan inlan tanin, game 49 a khelh tawh atangin goal 3 a khung tawh a ni.