England manager Gareth Southgate chuan Jude Bellingham-ah ringawt an in nghat lo tih a sawi.
Three Lions hian 2024 European Championship hmaa an match hnuhnung ber chu Zirtawpni zan khan an khel a, rinloh takin Iceland an hneh lo. EURO khel tur an thlanchhuah zingah, Bellingham-in team a zawm tlai ber a, Champions League final an khelh vang a ni.
Kum 20 mi hian a tanpui thei angem tia an zawhna chhangin Southgate chuan, "A thei tih ka chiang a mahse a mawhphurna a nilo. A laka pressure awmte tha takin a dawngsawng thiam a, amahah innghat bur erawh kan nilo. Player tha dang tam tak kan kawl a, a huhoa champion kan duh." tiin a sawi.
Real Madrid midfielder Bellingham hian Spain-a a season hmasa berah hun nuam tak a hmang a, La Liga leh Champions League an chawi bakah La Liga player of the season a ni bawk. Iceland an hnehlohna inkhelah hian ball an chang tam zawk a, shot vawi 13 an neih atangin vawi khat chiah goal zawnah an pet thei.
Jordan Pickford aia lut Aaron Ramsdale a chesual tam a, an tlarhnunga awmte vangin goal an chhuah. Bayern Munich striker Harry Kane pawh zan dang angin a hlauhawm lova, minute 12-naa Jon Dagur Thorsteinsson tih luh hmangin Iceland an chak. Tlawm zawk an ni nachungin Southgate a lawm a, Bukayo Saka leh Cole Palmer-te hming lamin a fak.
Pu Chhimkawngkhara chuan, "Khelmuala Saka kan hmu leh ta kha ka hlim a, training-na a tel tam loh avangin inkhelh ngei ngei a mamawh. Tha taka season a hman hnuah Palmer a chuai lova, a tih tur tak tiin a talbuai lo. First half leh second half-ah a tangkai a, kan tumpuite tan a hnawksak khawp mai." tiin a sawi.
FIFA rankings-a 72-na in an hneh hi a mak a, amaherawchu chhuanlam siam thei an nilo. Minute 90 chhungin huntha an nei lo a tih theih a, intihsiakna hmachhawn tur an nih avangin an fan-te an zam ru viau maithei. Southgate mitah Palmer tha viau mahse, fak vak tlak a ni hran lova, Newcastle United forward Anthony Gordon pawh a khel tha lem lo.
Number ten anga an chhawr Phil Foden a parchhuak zo lova, an nawi em avangin si phur zawk an ni tih a hriatloh. EURO 2016 atanga hnawtchhuaktu Iceland-in an hneh nawn a, inenfiah an ngai nasa khawp mai. Hetih lai hian inpuahchahna inkhel (warm-up match) mai mai a ni a, khukpui hluai atan chuan a te tham deuh.
Germany-a an zin hmain hun a tam lutuk tawh lova, inthlahdah thei an nilo. An fan-te'n kut bengin an thlah a, an duh ang result nei lo mahse EURO atan duhsakna an hlan. Awlsam taka Bosnia-Herzegovina an hneh hnuah ho takin an tlawm a, anmahni tantute ngaih a ngam thei lo.
West Ham United leh England defender hlui Matt Upson chuan, "Dawl zawrin an zawr a ni ber e. Nawr tumna emaw tharum hman tumna emaw an nei lo. An khelh dan kha a hneawm ngawih ngawih a, pawm thiam a har khawp mai. Intihsiakna liantham khel tur an ni a, tun ang kha chuan an thlensan ka beisei lo." tiin BBC Radio 5 Live-ah a sawi.
Aston Villa striker ni thin Dion Dublin pawhin Southgate leh a naute a dem a, inchhuang thei tumah an awm lo tih a sawi. Southgate kaihhruaina hnuaiah, England hian EURO hnuhnung berah final an lut a, penalty shootout-ah vanduaiin Italy an hneh lo. FIFA World Cup hnuhnung pahnihah pawh semi-final leh quarter-final an lut a, an duh ber nomawi an hlawhchhuak lo.
EURO lo thleng turah hian tute nge an chhawrrim dawn a hriatloh a, naupang rualin hruaiin Germany an pan ang. Southgate hnuaia an rinrawl ni thin Marcus Rashford, Kalvin Phillips, Jack Grealish leh Harry Maguire-te hmuh tur an awm dawn lova, engtin tak in rem ang maw?
Starting XI-a lut turte rin thiam an har a, lut tur chiangsa anga ngaih theih erawh an awm. Foden-in central postion-a a awmin, tun season-ah Manchester City tan goal 27 a khung a, kum dang angin a sirah a tal tam lo. Iceland lakah pawh number ten angin a khel a, tihsual hlau ni awm takin a fimkhur hle.
EURO-ah pawh an rinrawl pakhat a ni ngei dawn a, mahse Bellingham vangin a sirah a awm a rinawm. Bellingham hian Germany an pan hmain a zawm dawn a, duh lo sa teh pawh nise an innghahna ber a ni ang. An midfielder-te enin Declan Rice a lut ngei ngei dawn a, mahse tuin nge dinpui ta ang?
Iceland an hnehlohna inkhelah Kobbie Mainoo nen an inkawp a, Manchester United rawlthar hian a tih tur a tih loh avangin goal an chhuah. Bosnia-Herzegovina an hneh tuma fak hlawk em em mai, Crystal Palace midfielder Adam Wharton tan erawh rilru hahna tur a awm lova, bench-ah awm tluanin a lut lo.
Rice kianga ding thei zingah Liverpool full-back Trent Alexander-Arnold a tel a, defender ni mahse a laiah a awm thei. An team zinga tawnhriat nei tha ber pakhat a ni bawk nen duhsak a hlawh maithei a, Southgate-in midfield-ah a chhawr lo ang tih a sawi theihloh.
An tlarhmaa awm turte pawh rin thiam an har a, Palmer leh Saka kan buk tawn lo thei lo. Kum 22 mi Palmer hian Bosnia-Herzegovina an hmachhawn tumin goal a khung a, season kal meka a telna Premier League, FA Cup, Carabao Cup, UEFA Super Cup, Community Shield leh international level-ah te goal a nei ta vek.
Inkhel bultantu zingah tel a phu tih a pholang a, amaherawchu Saka nen an inel a tul. Arsenal winger hian a ke veilam hmang thiam zawk mahse, Southgate-in ding lamah a chhawr fo a, a sulhnu enin a che chhe lo. Everton leh Manchester United captain hlui Wayne Rooney chuan tlarhnungah an ngaihtuahawm dawn tih a sawi a, a dikna chen a awm.
Iceland player-in a ke reka a rahsak avangin John Stones a khel tluan lova, half time-ah lakchhuah niin Ezri Konsa a lut. Maguire a tel loh takah chuan, Stones bula ding tur a hriatloh a, duhthlan tur tha tak tak an awm. Stones hian kumin bikah game 15 chiah ala khel a, hei hi minute 1,073 niin a inlan tam lo.
A hliam neih hi ngaihtuahawm lutuk niin a lang lova, EURO-a an game hmasa berah Marc Guehi nen an inkawp a rinawm. Veilam sir tlan turin Kieran Trippier leh Luke Shaw an awm a, Shaw hi hliam damkawr anih avangin an chhawr nghal lo maithei. Trippier hian Mimkut thlaah kum 34 a tling dawn a, kuminah minute 931 chiah ala khel a ni.