England aia Germany tana khelh tum Musiala

24th February 2021, 10:02PM

Bayern Munich rawlthar Jamal Musiala chuan senior level-ah England aia Germany tana khelh a tum thu a sawi.

Musiala hi a nihna takah chuan ram pathum tana khel thei dinhmunah a ding meka, Germany-a piang niin, a naupan laiin England-ah an pema, a pa hi Nigerian niin a nu hi German a ni a, Germany, England leh Nigeria tan te a khel thei vek.

Musiala hi youth team lamah England leh Germany tan a khel ve ve tawha, tunah hian kum 18 tling ve tawhin, senior team lamah pawh an koh chhoh ve mai a rinawm hle a, Germany tan a khel chho dawn niin a lang.

Musiala chuan, “Ka hma hun atana tha ber tur te, ka inkhelh tam theih berna tur te han ngaihtuah viau mah ila, hun eng emaw chen ata tawh kha Germany tana ka khelh hi a dik berin ka hria a, ka pianna a ni. Thutlukna siam awlsam erawh a ni lova, Germany ka hmangaiha, England pawh ka hmangaih em em a, ka hmangaih ve ve reng dawn.

“England hi ka tana a hlut zia hi sawi thiam theih chi pawh a ni lova, thil tha tam tak ka lo tawn tawhna hmun a ni,” a ti.

Musiala hi Chelsea academy-a awm thin a ni a, kum 2019 khan Bayern Munich-in an laluta, tunkar khan UEFA Champions League round of 16 inkhelah Bayern tan goal khungin, English mi Champions League-a goal khung thei naupang thar a ni.

 

Copyright © inkhel.com 2024. All rights reserved.