England sawrkar chuan stadium chhunga entu mipui awm inkhelh theih thuai dan a ngaihtuah mek a, Premier League season tharah pawh entu mipui an awm ngei tawh a beiseiawm hle.

UK-a an Minister of Sport Nigel Huddleston chuan entu mipui awma inkhel huaihawt dan an ngaihtuah mek thu leh, chutiang hawi zawnga hma an lak mek thu a sawi.

UK Prime Minister Boris Johnson pawhin England-ah hian October thla atang chuan entu mipui awma inkhelh a theih a rinawm thu a lo sawi tawha, beiseina a sang chho hle.

Thawhlehni khan exhibition match-ah Warwickshire leh Worcestershire-te chu Edgbaston-ah an inkhela, hetah hian entu mipui tlem awm phal a ni nghe nghe a, enchhinna ang deuh pawh a tih theih awm e.

Coronavirus chuan ziaawm lam a pan hret hret a, thi zat pawh tla hniam tawh hle in, nunphung khailak lutuk pawh a ziaawm chho tawh viaua, Premier League season thar hi September thla ni 12 atanga khelh tan ni dawnin, a tir lamah entu mipui an awm thei nghal lo a nih pawhin, October thla chho atang hian stadium chhungah mipui an awm leh theih ngei a beiseiawm hle a ni.