"England-ah Klopp a lut mai lo ang." - Lambert.

17th April 2015, 02:04PM

Aston Villa manager hlui Paul Lambert chuan tun nipuia Dortmund chhuahsan dil Jurgen Klopp-a'n Premier League lam a hawi nghal mai lo ang tih a sawi.

Lambert leh Klopp hi in thian tha tak an ni a, Dortmund manager ni mek Klopp hian tun season tawpah German club hi chhuahsan a duh.

Lambert chuan, "(Premier League-a a luh chu) ka beisei lem lo. A luh loh pawhin mak ka ti hran lo ang. Ram hrang hrang atangin duhtu an tam ang a club lian tak takin an duh ang." tiin BBC Radio 5 live hnenah a sawi.

Kum 47 mi Klopp hian kum 2008 May thla khan Mainz chhuahsanin Dortmund hi a zawm a, Thomas Doll hmunruak a hnawhkhat. Dortmund hi khawvel hmuhah pholangin team tha tak a din a, player tha tak tak a hnuaiah hian an chhuak bawk.

Bundesliga-ah Dortmund hi vawihnih champion puiin German Cup nomawi vawikhat a lakpui a, kum 2013 khan Champions League final a thlenpui bawk a he final-ah hian an elpui Bayern Munich 2-1 a hneh lovin an vanduai.

Manchester United-in Louis van Gaal an lakluh hma khan Klopp hming hi a ri ring hman hle a, tunah chuan Manchester City nen sawi zawm an ni leh tawh.

Lambert thung hian kum 1997 khan Dortmund hi European Cup (Champions League) nomawi a chawipui a, kum 2004 khan Klopp nen hian coaching lam an zirnaah an intawng. Villa a chhuahsan hnuah pawh Dortmund-ah hian ni kaw chhung German ho team enkawl dan zirin a awm.

Villa manager hlui hian Klopp hi English football-ah a buai a ring lo va, mifing tak a ni tih pawh a sawi.

Sawi chhunzawmin kum 45 mi Lambert chuan, "England-ah kal ala duh mai angem? tiin min zawt ta ula, a duh chu ka ring. A chhan chu English a thiam a mifing a ni bawk."

"Premier League tan pawh a ropui thei dawn a, a thiamna in a tlin. Bristish coach-te thiamna ang a nei a, British football-ah hian in bengbel turin buaina a neih ka ring lo." tiin a sawi.

Copyright © inkhel.com 2024. All rights reserved.