​England-ah khan ka hlim tawh lo : Mkhitaryan

11th September 2019, 02:09PM

Armenian footballer Henrikh Mkhitaryan chuan tun nipui chhung khan Arsenal chhuahsanin, loan-in Italian club Roma a zawma, a chhuah chhan sawiin England-a a hlim tawh loh vang niin a sawi.

Kum 2016 khan kum 30 mi Mkhitaryan hi Germany atangin England-ah a insuana, Borussia Dortmund atangin Manchester United a zawm. Nikum mai khan United chuan Alexis Sanchez lakluh nan Mkhitaryan hi hmangin Arsenal lamah an kal tir ve leh.

Arsenal tan Mkhitaryan hian season khat leh a chanve chhungin game 39 a khel hmana, goal riat khung bawkin, a duh anga tam a inkhel meuh lo.

Mkhitaryan chuan, “Khawi hmunah pawh awm ila nuam ti taka football khelh ka duh a, England-ah kha chuan ka hlim tawh meuh lo a ni. England atanga dawrtu ka neih khan ka agent-in min biaa, ka tan hun tha a ni tih hria in, sum lam pawh eng mah ngaihtuah buai lovin England ka pan nghal. English football-ah ka insiamrem thei lo pawh a ni maitheia, ka tan chuan ka awmna thlak a hun a ni,” a ti.

Sawi zelin, “Arsenal-ah khan ka hun tawp lamah ka hlim lova, chuvanga Roma pan ka ni a, Roma-ah hian hlim tur leh football khelh nuam ti leh tura kal ka ni. Tunah chuan Rome-ah ka awm a, anmahniah hian ka rilru ka pek vek a ngai. Roma hi team tha tak an ni a, ka tawlhhnung tihna a ni lo. Ka awmna ka thlak duh a, Roma hian chu mi hun tha chu min siamsaka, ka bawhpelh phal lo a ni,” a ti bawk.

Copyright © inkhel.com 2024. All rights reserved.