12 Oct 2020 05:16

inkhel

Eng vanga tlu nge ka nih ka hrethiam lo: Rossi

Valentino Rossi chu Pathiannia an intlansiaknaah a tirah a tlu nghal a, a tlan zui thei ta lo a. Italian rider hian eng vanga tlu nge a nih a hriat loh thu a sawi.

Le Mans cicuit-a French Grand Prix an tlanah ruah a tlak nasat deuh avangin an tlan hun tura ruahmanah pawh an tlan thei lo a. Intlansiak an tan deuh chauh a, kawi hmasa berah Valentino Rossi chu a tlu nghal a, a tlan chhunzawm thei ta lo a ni.

Tun hnaiah Valentino Rossi hi vawi thum chu a tlan tluanchhuak thei lo tawh a. Catalan Grand Prix-ah pahnihnaa a tlan laiin a chesual a, a tlan chhunzawm thei lo a. Emilia Romagna Grand Prix-ah pawh a chesual a, a tawp thleng a tlan thei lo tawh bawk a ni.

Rossi chuan, “A lawmawm lo duh khawp mai a, kawng kawi hmasa bera tluk nghal chu thil fuh lo tak a ni,” a ti.

“Bul kha ka tan tha viau mai a, tlan tha viau tura inngai ka ni a. Chutih laiin kawng kawi hmasa ber kan thleng a, thlamuang taka kan tlan laiin beisei loh thil a thleng ta tlat mai a, boruak khan a zir ngang lo a ni berin ka hria,” a ti bawk.

A sawi zelnaah, “Kawng kawiah khan ka tlan chak hranpa pawh a ni lo a, chuti chung chuan ka tlu tho mai a, eng vanga tlu nge ka nih kha ka hrethiam lo khawp mai,” a ti.

“Fimkhur viaua ka inhriat laia ka tlu kha ka vanduai vang a ni ber a. Tun hnai intlansiak vawi thumah point ka hmu thei ta miah lo mai a, hei bak baka vanduaina nasa hi a awm lo ang,” tiin Rossi chuan a sawi.

Pathiannia intlansiakah hian Valentino Rossi chauh hi a tlu bik lo a, rider dang pawh tlu an awm ve tho a. Suzuki rider Alex Rins pawh lap 20-ah pahnihna a nih laiin a tlu ve tho a. Pramac rider Jack Miller pawh a bike chian loh vangin lap 19-ah a chawl ve bawk a ni.