08 Feb 2019 03:26

inkhel

​Emiliano Sala 1990-2019

Cardiff City player manto ber; a club thar tana vawikhat pawh inkhel hman lova vanduaina tawka boral ta Emiliano Sala chu kum 1990 October thla ni 31 khan khan Argentina ram Cululun, Santa Fe-ah a lo pianga, Horacio Sala leh Mercedes Taffarel- te inkara piang niin, unau pahnih a nei a, mipa Dario leh hmeichhia Romina-i te an ni. 

6ft 2’ laia sang Sala hi Independiente fan ruh tak a ni a, a naupan deuh lai atangin a footballer ngaihsan ber Gabriel Batistuta-a che vel chu video-ah enin, a inzir nasa thin hle. Kum 1994 khan Club San Martin de Progreso academy-ah lutin, kum 2005 khan Proyecto Crecer-ah a insawn leha, kum 2010 khan French club Bordeaux chuan an academy-a chher turin an lalut.

Bordeaux senior tam tan Sala hian kum 2012 atang a khel tan a, Nantes chuan kum 2015 euro maktaduai khat vel sengin an laluta, kum nga daih contract an ziahpui. Amah hi striker niin, striker palian che muang lem lo tak, finishing pawh chhe lo tak a ni a, tun season-ah Nantes tan game 19 khel hmanin goal 12 lai a khung.

Nantes tan hian a che chhe lo hle tih a lan chianna em em chu kumin thlasik bazar hun lai khan Premier League club Cardiff City chuan an club chanchina an player manto ber ni turin kum 28 mi hi lalutin, a manah pound maktaduai 18 lai an seng.

Kumin January ni 19 khan Welsh club Cardiff City chuan Sala hi an lalut fela, kum thum leh a chanve chhung daih contract an ziahpui. Cardiff hma hian Sala hian Chinese Super League club atangin dawrtu a nei a, sum a hmuh tur tam zawk mahse Chinese club hi hnarin Cardiff a zawm.

Cardiff City-ah medical a neih zawhin Sala hi Nantes lamah a kir leh a, a tum dan chuan Janury ni 21-ah Cardiff-a kira, a tuka a thian tharte bula training zawm a ni. Cardiff manager Neil Warnock chuan Sala hi Cardiff leh Newcastle inkhel en turin a sawm a, mahse Sala hian Nantes lama a team-mate hluite mangtha tur leh a bungruate la turin a manager sawmna hnawlin Nantes-ah hian a kir.

January ni 21-ah an tum ang ngei chuan Sala leh pilot David Ibbotson-te chu thlawhna-te The Piper Malibu an tihah chuan thlawkin, Nantes atangin Cardiff an pana, mahse tum ang leh ruahman angin thil a awm ta lo. English Channel chunga an thlawh laiin biak pawh theih an ni ta tlat lova, a tukah pawh traininga zawm lo zuia, Cardiff-ah pawh a thawm hriat a ni lo. Anmahni leh an thlawhna hi zawn nghal a ni a, ngawrh taka zawn an nih hnuah hnuhma engmah hmuh mumal a awm loh avangin Sala-te zawn hna hi tihtawp a ni zui bawk.

Sala leh Ibbotson-a chhungte leh thiante chuan thil ni theiin an hre lova, footballer hrang hrang-te sum thehkhawm atanga an pawisa hmuh chuan private-in thlawhna zawngtu tur an ruai ta a, thlawhna hi tui hnuai thuk takah hmuh zui a ni bawk. Remote hmanga control theih lirthei Remotely Operated Vehicle (ROV) an tih hmang chuan he thlawhna hi Sala-te chuanna ngei a nih thu finfiah a nih bakah, a chhungah ruang pakhat an hmu bawka, ruang hi lak chhuah niin Sala ruang ngei a ni tih finfiah a ni zui ta a ni.

Sala chungchang hian football khawvel a dengchhuak hneh hle a, theihnghilh a ni ngai dawn tawh lo. Mihringte hian kan hmahun hi kan hre lo hle a, Sala pawh hian a thil tawn tur hi mang lamah pawh ala mang chhin ngaiin a rinawm loh. Kan zavai mai hian Pathian kuta kan inkawltira, eng hunah pawh kan hun a thleng thei tih hriaa Pathian kan hnaih reng hi a pawimawh zia kan inzirchhuah a ngai hle. Chutiang chu kan zirchhuak a nih ngai chuan, Mizo kristian—te hian keimahni tawkah Sala thihna hi kan ti thlawn lo thei a ni.

Emiliano Sala, thlamuang takin chawl mawlh ang che!