10 Nov 2018 02:54

inkhel

Embiid zarah Sixers an chak hram

Philadelphia 76ers chuan hma hruai tha viau mahse Charlotte Hornets an inpawhthlaktir a, overtime khelin 76ers hi Embiid zarah an chak hram.

A thlengtu Philadelphia 76ers te hi awlsam takin an chak ngei dawn niin a lang a, third quarter-ah point 21 ngawtin hma an hruai a. Mahse Hornets chuan Kemba Walker thawhrah sengin an inkar zau tak chu an rawn tizim leh ta vek a, overtime khelh a ngaih phah a ni.

Kemba Walker chuan point 30 a score a, Hornets chu a chakpui ngei dawn nia a lan laiin Philadelphia tan Joel Embiid a inlar ve thung a. Sixers palian hian he inkhelah hian point 42 ngawt a thun a, fourth quarter bikah point 16 zeet a thun a, hun pangngaiah 117-117 in an inhnehtawk a, overtime hi an khel zui a.

cript async src="//pagead2.googlesyndication.com/pagead/js/adsbygoogle.js">

Overtime-ah hian Embiid chu a inthlahdah mai lo a, point 5 a score belh leh a, free throw hmangin Sixers chakna a thun zui a. Embiid hian point 42 a score bakah rebound 18 ngawt a la bawk a, Philadelphia chu mualpho theihna atangin a hruai chhuak thei a. Anmahni court-ah Philadelphia chu vawi 7 an chak ta a, hneh loh an la nei lo a. Ben Simmons chuan point 22 a thun a, assist 13 neiin rebound 8 a la bawk a ni.

Utah Jazz chuan 123-115 in Boston Celtics an hneh bawk a. Joe Ingles chuan point 27 a score a, Donovan Mitchell chuan point 21 thunin Jae Crowder pawhin point 20 a thun bawk a. Rudy Gobert leh Ricky Rubio te chuan point 17 ve ve an score bawk a ni.

Karl-Anthony Towns chuan point 39 ngawt mai a thun a, rebound 19 a la bawk a, mahse heti chung hian Minnesota Timberwolves chu Sacramento Kings lakah 121-110 in an tlawm tho a. Detroit Pistons forward Stanley Johnson chu bench atanga lutin minute 24 chhungin point 22 ngawt mai a score a, rebound 7 lain steal 3 a nei bawk a, Pistons chuan 124-109 in Altanta Hawks an hneh.

Nikola Jokic chuan point 37 a score a, rebound 21 a la bawk a, mahse Denver Nuggets chuan Brooklyn Nets chu 112-110 in an hneh ta chuang lo a ni.

Result hrang hrang:

Philadelphia 76ers 133-132 (OT) Charlotte Hornets

Orlando Magic 117-108 Washington Wizards

Detroit Pistons 124-109 Atlanta Hawks

Indiana Pacers 110-102 Miami Heat

Brooklyn Nets 112-110 Denver Nuggets

Utah Jazz 123-115 Boston Celtics

Sacramento Kings 121-110 Minnesota Timberwolves