Arsenal boss Arsene Wenger chuan Egyptian midfielder tuna Basel-a khel mek Mohamed Elneny la turin a tihfel ngai ang ang an tihfel thawkhat thu a sawi a, ni hnih emaw ni thum emaw hnuah Arsenal player a nih mai tawh tur thu vawiin khan a sawi a ni.
Kum 23 mi Mohamed Elneny hi Arsenal chuan £5million-in Basel atangin an lei chhuak dawn nia tarlan a ni a. England-a seng luh an tumna kawngah hian thil buaithlak tak tak an tawng a, mahse Wenger chuan a harsa zual zawhfel tawh a nih thu a sawi a ni.
"Thil buaithlak deuh deuh kan hmachhawn a, mahse kan thawk rim a, ni hnih emaw ni thum emaw hnuah engkim kan tihfel ka beisei a ni." tiin Wenger chuan a sawi. Thla hmasa khan January transfer window inhawn chhungin Wenger chuan player an lei ve nual tur thu a lo sawi tawh a nih kha.
Tunah hian Premier League hmahruaitu an ni mek a, hetih lai hian a player thate inhliam vangin a chhawr theilo mek. Season chawhnu lamah team khawng tak ni chhunzawm zel turin Wenger chuan player thar dap a tum zel a, Elneny lo pawh hi midang an lak tur thu a sawi chiang.
"Ani chauh hi a ni dawn lo. Elneny hi he hun chhunga kan lak turte zinga pakhat chauh a la ni e," tiin Arsene Wenger chuan player dang dang pawh lak an tum thu a sawi chiang a ni.