Sunday zan Premier League inkhel awmchhunah Liverpool chuan Elland Road-ah Leeds United an tlawh a, mikhual lam Liverpool hian si thum faiin hnehna an chang.
Liverpool tan hian Mohamed Salah, Fabinho leh Sadio Mane te chuan goal khat theuh an khung a, Salah goal hi a Premier League goal 100-na chiah niin, Didier Drogba (104) nen chiah African mi Premier League-a goal 100 khung tling thei an awm.
Khelh 4-ah Liverpool hian point 10 hlawhchhuak tawhin, pathumnaah an awm a, an chunga awm pahnih Manchester United leh Chelsea te nen an point a inang vek a ni.
Leeds United 0-3 Liverpool
(Salah 20’, Fabinho 50’, Mane 90+2’)
Player Ratings
LEEDS: Meslier 7, Ayling 6, Firpo 6, Cooper 6, Llorente 5, Dallas 6, Phillips 6, Harrison 6, Raphinha 6, Rodrigo 5, Bamford 6. Subs: Struijk 4, Roberts 6, James 6.
LIVERPOOL: Alisson 7, Alexander-Arnold 8, Robertson 7, Van Dijk 7, Matip 8, Fabinho 8, Thiago 8, Elliott 7, Mane 7, Jota 7, Salah 8. Subs: Henderson 6, Oxlade-Chamberlain n/a, Keita n/a.
Inkhel tan atanga 20mins-ah Trent Alexander-Arnold-a low cross chu Egyptian forward Salah chuan goal-ah a lo khung a, Liverpool hma a hruaipui a, English full-back Alexander-Arnold hian Premier League-ah assist 35 a nei tling ta chiah bawk a ni.
Goal an khung hnu deuh lawkah Liverpool hian chance an nei zui leh nghal a, box chhung atangin Mane chuan goal bar chung deuh lawkah ball a thlawh. A tir lamah Leeds tan Rodrigo chuan chance neiin, half time dawnah Ayling pawhin chance nei leh mahse Leeds tan goal an khung thei lo ve ve.
Liverpool in first half an thunun a, mahse goal khat chiah khungin, first half-ah hian Mane, Harvey Elliot leh Virgil van Dijk te chuan goal khungna hun tha tak tak an nei a, Leeds hian first half-ah goal khat chiah an chhuah hi an vannei.
Second half an tana, minute nga vel awrh an khelhin Liverpool-in an goal hnihna an khung. Corner atanga ball vawrh luh chu Van Dijk chuan lo tauhin, Fabinho chuan hei hi goal-ah a lo pet lut zui a, 2-0 in Liverpool hian hma an hruai.
Darkar khat khelh a nih chiahin thil pawi tak a thleng a, Leeds-in bench atanga an dah luh Pascal Struijk chuan Liverpool rawlthar Elliot chu hlauhawm takin a kherhthlu a, kum 18 mi Elliot hi na tiin leiah a tlu. Struijk hi referee chuan direct red card pe in a hnawt chhuak a, Elliot-a ke hi a tliak ngei niin a lang a, khelmual chhunga buaipui a nih hnuah zawn chhuah a ni.
80mins chuang hret khelh a nihin team hnihte atangin chance kan hmu a, mahse goal-ah an chan tir thei lo. Injury time-ah Liverpool hian an goal thumna an rawn khung a, Jordan Henderson-a cross chu Thiago chuan lo la in, Thiago hian fing takin Mane a pe a, Mane hian goal-ah chantirin, 3-0 in Liverpool hi an chak a, point 3 nen an haw ta a ni.
