October ni 26, Zirtawpni zan Mc Dowell's No 1 Soda Mizoram Premier League (MPL) Season 7 Round 9 match hnuhnung ber kai thar Electric Veng FC leh Ramhlun North FC inkhelah chak zawk awmlo in 1-1 in an inhneh tawk a, point khat ve ve an hlawh chhuak. He inkhelah hian Electric Veng FC midfielder Isaak Vanlalpeka chuan Man of the match-ah thlan a ni.

Team pahnih te hi round 7 serchhip khelmualah in tawngin Electric Veng FC hian 3-2 in anhneh a, an intawn vawi hnihnaah chak zawk an awm lo in an inhneh tawk. 

Electric Veng FC hi kai thar ni mahse team tha an ni a, point 17 nei tawhin pahnihna an ni mek a, semifinal khel turin an dinhmun an sawh nghet zel a ni. Ramhlun North FC hian an dinhmun siam that tumin foreigner pathum la lut mahse  beisei erawh an pha lo, point 6 neiin pasarihna an ni mek a ni.

Goal lut te hi first half leh second half-a lut an ni a, first half-ah Electric Veng FC tan Vanlalremsanga goal khung chu second half-ah Ramhlun North FC tan Lalnunmawia chuan an siphurh a rul.

Electric Veng FC 1-1 Ramhlun North FC

(Vanlalremsanga 27') (Lalnunmawia 62')

MoM: Isaak Vanlalpeka, Electric Veng FC.

First half-ah team pahnih te an innawr tawn zak zak hnuah Electric Veng FC chuan an hun tha neih hmang tangkai hmasa zawkin minute 27-ah Ramhlunchhunga'n ball tha a hmuh chu box-ah la lutin a shot tha zet chu Ramhlun North FC keeper Eddie Zorammawia chuan a dangper a, ball per let chu Vanlalremsanga chuan an hmahruaina goal a tan a khung. 

Electric Veng FC chuan nawr chhunzawmin goal thun belhna hun tha an nei leh a, mual veilam sir a tang a Ramhlunchhunga ball vawrh luh box chhung a tang a M. Lalrintluanga shot chu Eddie Zorammawia chuan a dan sak.

Ramhlun North FC chuan an siphurh sut ngei tumin an nawr let a, Dingngheta, Lalnunmawia leh Lalremruata te chuan hunawl an nei thei lo a, first half huntawp dawnah Ramhlun North FC forward Lalliansanga chuan an siphurh sutna hun tha a neih chu a hmang tangkai thei lo a, goal luh belh lo in Electric Veng FC chuan 1-0 a hmahruaiin chawlhlawk an hmang.

Second half tan a ni a, Ramhlun North FC chuan nawr nghalin foreigner forward Waheet chuan Electric Veng FC keeper Nunmawia chiah a hmachhawn hnuah goal kham chungah a pet. Ramhlun North FC chuan nawr chhunzawmin minute 62-ah box pawn chiah a tang a Lalnunmawia shot tha zet chu Electric Veng FC keeper Nunmawia chuan a dang hman lo a, mawi takin an siphurh sutna goal a khung a ni. 

Huntawp dawnah Electric Veng FC chuan goal thun belhna hun tha neiin M. Lalrintluanga chuan a hun tha neih a hmang tangkai thei lo a, Ramhlun North FC pawhin hun tha nei ve bawkin bench a tang a lut Vanlallawma chuan a hun tha neih a hmang tangkai thei bik lo. Goal luh belh tawh lo in 1-1 in an inhneh tawk ta a ni.

(adsbygoogle = window.adsbygoogle || []).push({});