Mizoram Premier League (MPL) Season 8 khelh mekah November ni 27, Nilaini khan FC Venghnuai leh Electric Veng FC ten League round an match hnuhnung ber an khel a, chak zawk awmlo in 1-1 in an inhneh tawk. He inkhelah hian Electric Veng FC forward Ramhlunchhunga chu Man of the match-ah thlan a ni.

Electric Veng FC hian point 20 neiin palina nichungin semifinal an khel dawn ta a ni. Mizoram Police FC hian BN Mullick Memorial All India Police Football Tournament khel turin December 4-19, 2019 chhung Kolkata-ah an zin dawn avangin MPL Semifinal ankhel dawn lo a, semifinal-ah Aizawl FC leh pangana Chanmari FC-te an in hmachhawn ang a, Chhinga Veng FC leh Electric Veng FC an intum bawk ang. FC Venghnuai hian point 12 neiin pasarina an ni a, play off an khel ang a, an inpet tlin chuan season tharah MPL an khel leh ang.

Goal lut te hi first half leh second half a lut an ni a, first half-ah Electric Veng FC tan Lalrammawia goal khung chu second half-ah FC Venghnuai tan HK Lalhruaitluanga chuan an siphurh a rul.

07:30 PM FC Venghnuai 1-1 Electric Veng FC

(HK Lalhruaitluanga 69') (Lalrammawia 4')

MoM: Ramhlunchhunga, Electric Veng FC

Inkhel tan atanga minute 5-ah Electric Veng chuan an hun tha neih hmang tangkaiin forward Lalrammawia'n ball tha a hmuh chu box-ah lalutin an hmahruaina akhung. Electric Veng chuan nawr chhunzawmin minute 15-ah Penalty anhlawh chhuak a, he penalty hi midfielder Jacob Lalrawngbawla chuan goal-ah achantir thei lo.

Electric Veng pawhin nawr let ve bawkin forward Laldampuia chuan an siphurh sutna hun tha a hmuh chu a hmang tangkai thei lo a, Electric Veng chuan 1-0 a hmahruaiin chawlhlawk an hmang zui ta a ni.

Second half-ah goal khat aluh belh a, FC Venghnuai chuan an siphurh sut ngei tumin annawr nghal a, Laldampuia ball vawrh luh tha zet chu midfielder JH Lianzuala chuan a hlawi thelh hluah a, Electric Veng anhim hram.

FC Venghnuai nawr chhunzawmin minute 69-ah forward Isak Vanlalpeka ball vawrh luh tha zet chu HK Lalhruaitluanga chuan tauh lutin an siphurh a rul. FC Venghnuai chuan goal thun belhna hun tha nei zuiin Vanlalthanga'n a hun tha a hmang tangkai thei lo a, huntawp dawnah Vanlalthanga hnawhchhuah zui a ni a, Electric Veng FC chuan player tam zawkin khel mahse, goal an khung thei tawh bik lo a, 1-1 in an inhneh tawk zui ta a ni.

(adsbygoogle = window.adsbygoogle || []).push({});