Electric Veng FC-in Ramhlun North FC an hneh

14th October 2018, 03:10PM

October ni 13, Inrinni khan Serchhip Hmar Veng Sport Complex field-ah Mc Dowell's No 1 Soda Mizoram Premier League (MPL) Season 7 round 7 match vawi thumna Ramhlun North FC leh kai thar Electric Veng FC inkhelah Electric Veng FC chuan 3-2 in Ramhlun North FC an hneh. He inkhelah hian Electric Veng FC midfielder Emanuel Lalchhanchhuaha chu Man of the match-ah thlan a ni.

First half-ah Electric Veng FC tan M. Lalrintluanga leh David Lalchhuanawma chuan goal khat ve ve an khung a, Second half-ah David Lalchhuanawma chuan goal khat a khung belh leh bawk. Ramhlun North FC tan John Ampong leh Lalremruata chuan goal khat a khung ve ve an khung bawk.

Table mawngphah chhuahsan tumin Ramhlun North FC hian foreigner pathum an ziak lut a, an match hnuhnung berah an chung chiah a awm Bethlehem Vengthlang FC nen 2-2 in an inhneh tawk. Serchhip khelmualah foreigner an lak midfielder John Ampong, forward Bamba Musah leh Waheed Adekunle te an inlan kim vek a, point erawh an hlawh chhuak lo. 

Electric Veng FC hian an match hnuhnung berah Champion lai chhinga Veng FC an hneh loh avangin table-ah pahnihna an hauh a, Serchhip khelmualah point 3 an hlawh chhuak a, an dinhmun sawh nghetin semifinal khel turin beiseina lian tak an nei tawh. 

11:15 AM Ramhlun North FC 2-3 Electric Veng FC

(John Ampong 47' (P), Lalremruata 85') (M. Lalrintluanga 7', David Lalchhuanawma 36', 59')

MoM: Emanuel Lalchhanchhuaha, Electric Veng FC

Goal hmasa ber hi inkhelh a tang a minute 9-na lekah a lut a, Ramhlun North FC keeper Lalnunmawia tih sual nang chinin Electric Veng FC tan Lalrintluanga chuan cool takin an hmahruaina goal a khung.

Ramhlun North FC pawhin an siphurh sutna hun tha neiin box pawn chiah a tang a Dingnghet shot chu a goal ngei dawnin lang mahse goal kham chungchiahah a kal a, Midfielder John Ampong shot tha zet pawh goal dinglam sirah a kal leh bawk.

Electric Veng FC chuan minute 36-ah an hun tha neih hmang tangkaiin Ramhlunchhunga freekick tha zet chu Ramhlun North FC keeper Lalnunmawia chuan namperin he mi per let hi David Lalchhuanawma chuan goal-ah a chan tir a,  Electric Veng FC chuan 2-0 a hmahruaiin chawlh lawk an hmang zui ta a ni. 

Second half tan a ni a, minute 2 aral hmain Ramhlun North FC chuan penalty an hlawh chhuak. He penalty hi midfielder John Ampong chuan goal-ah chantirin an goal khatna a khung.

Electric Veng FC chawn nawr letin minute 59-ah an hun tha neih hmang tangkaiin Vanlalremsanga ball pek tha zet chu David Lalchhuanawma chuan box-ah la lutin an goal thumna a khung leh ta a ni.

Ramhlun North FC chuan an siphurh sut ngei tumin forward Bamba Musah leh Waheed Adekunle rawn lutin Bamba Musah erawh minute 2 a khel tling vel chiah a,  foul vangin referee chuan a chhuah tir zui a,  Goal thun ngei tumin natakin nawr mahse Lalliansanga leh Dingngheta ten hunawl an nei thei lo.

Goal luh belh tawh lo in Electric Veng FC chuan 3-1 in hnehna an chang tawh dawn emaw tih hnu huntawp dawn minute 5 ala awmin Ramhlun North FC tan Lalremruata chuan an goal hnihna khung mahse an siphurh sut turin hunin a daih tawh lo a, Electric Veng FC chuan 3-2 in hnehna an chang ta a ni.

Copyright © inkhel.com 2024. All rights reserved.