Mizoram Premier League (MPL) Season 8 khelh mekah November ni 21, Ningani tlai round 13 match hmasa ber Electric Veng FC leh Chhinga Veng FC inkhelah Electric Veng FC chuan 3-1 a Chhinga Veng FC hnehin point thum hlu tak an hlawh chhuak a, semifinal khelh beiseina an nei thar zel. He inkhelah hian Electric Veng FC forward Lalrammawia chu Man of the match-ah thlan a ni.

Team pahnih te hi round 4-ah intawng tawhin Chhinga Veng FC hian 2-1 in anhneh a, an intawn vawihnihnaah erawh Electric Veng an chungnung zawk. Chhinga Veng FC hian an match an khel zo tawh a, point 21 neiin pathumna nih chhunzawm mahse an dinhmun a derthawng hle. Chanmari FC hian point 16 neiin match hnih khelh hmabak anla nei a, Electric Veng FC pawhin match khat khelh hmabak anla nei ve bawk a, an result a zirin Chhinga Veng hian semifinal an khel lo thei a ni.Electric Veng FC hian point 19 neiin asang pali zingah anla tel. November 29, Zirtawpni zan dar 7:00-ah an match hnuhnung ber atan FC Venghnuai an hmachhawn leh ang.

Chhinga Veng FC 1-3 Electric Veng FC

(Lalrammawia 7', 69', Ramhlunchhunga 60') (MC Malsawmzuala 29)

MoM: Lalrammawia, Electric Veng FC

First half-ah goal hnih alut a, team pahnih te an innawr tawn zak zak hnuah Electric Veng chuan an hun tha neih hmang tangkai hmasa zawkin minute 7-ah mual dinglam sir atanga defender K Lalmalsawma ball pek tha zet chu box chhunga awm forward Lalrammawia chuan mawi taka tauh lutin an hmahruaina a khung.

Chhinga Veng pawhin an hun tha neih hmang tangkai ve bawkin minute 15-ah mual dinglam sir atanga forward Thasiama ball vawrh luh tha zet chu MC Malsawmzuala chuan tauh lutin an siphurh a rul a, 1-1 a inhneh tawkin chawlhlawk an hmang.

Second half-ah goal hnih a luh belh a, Electric Veng chuan inkhel thunun zawkin an hun tha neih an hmang tangkai nghal a, minute 60-ah forward Ramhlunchhunga'n ball tha a hmuh chu box-ah lalutin an goal hnihna a khung. Electric Veng chuan nawr chhunzawmin an hun tha neih an hmang tangkai zui leh a, minute 69-ah mual veilam sir atanga Ramhlunchhunga ball vawrh luh tha zet chu Lalrammawia bawk chuan pet lutin an goal thumna akhung zui leh ta a ni.

Chhinga Veng chuan an siphurh sut ngei tumin counter attack-in annawr a, huntawp dawnah forward MC Malsawmzuala'n box chhung chiah atangin goal ban apetper hlauh a, ansiphurh sut tumin nawr let chiam mahse, goal an khung thei tawh lo a, Electric Veng chuan 3-1 in hnehna an chang zui ta a ni.

(adsbygoogle = window.adsbygoogle || []).push({});