Mizoram Premier League (MPL) Season 8 Round 3 October ni 3, Ningani zan Chawnpui FC leh Electric Veng FC Inkhelah Electric Veng FC chuan 3-1 a Chawnpui FC hnehin point 3 hlu tak an hlawh chhuak. He inkhelah hian Electric Veng FC midfielder Vanlalremkima chu Man of the match-ah thlan a ni.

First half-ah goal thum a lut a, second half-ah goal khat a luh belh bawk. Electric veng FC tan Vanlalremkima, Ramhlunchhunga leh David Lalchhuanawma te chuan goal khat theuh an khung a, Chawnpui FC tan Lalnumawia chuan goal khat a khung ve bawk.

Electric Veng FC hian khelh tawhah FC Venghnuai leh Aizawl FC an draw ve ve hnuah Chawnpui FC an hneh a, point 5 neiin table-ah pahnihna an hauh lailawk a, round 3 khelh zawh ala nih loh avangin table hi la danglam thei a ni. Chawnpui FC hian khelh tawhah hneh anla nei lo a, table hnuai berah anla awm a ni.

07:00 PM Chawnpui FC 1-3 Electric Veng FC

(Lalnumawia 37') (Vanlalremkima 8', Ramhlunchhunga 25', David Lalchhuanawma 84')

MoM: Vanlalremkima, Electric Veng FC

Inkhel tan a ni a, Electric Veng FC chuan an hun tha neih hmang tangkai nghalin minute 8-ah mual dinglam sir atanga Defender K Lalmalsawma ball pek tha zet chu box chhunga awm midfielder Vanlalremkima chuan chiang zet a chhuih lutin an hmahruaina a khung.

Chawnpui FC pawhin an siphurh sutna hun tha neiin forward Vanlalthlamuana'n Electric Veng FC keeper Muansanga chiah a hmachhawn hnuah goal sirah chiah a pet. Electric Veng FC pawhin goal thun belhna hun neiin Vanlalremkima chuan a hun tha a hloh ve bawk.

Minute 25-ah Electric Veng FC chuan free kick an hlawh chhuak. Ramhlunchhunga rawn pen chhuakin mawi takin goal arawn khung. Electric Veng FC chuan 2-0 in hma an hruai ta a ni. Chawnpui FC chuan an siphurh sut ngei tumin an nawr let a, minute 37-ah freekick an hlawh chhuak. Lalnunmawia (Mawitea) rawn pen chhuakin an siphurh a sut then. First half huntawp dawnah Chawnpui FC chuan an siphurh sutna hun tha an nei leh a, forward Moody Lalawmpuia chuan Electric Veng FC keeper Muansanga chiah ahmachhawn hnuah Muansanga chuan a dan sak a, Electric Veng FC chuan 2-1 a hmahruaiin chawlhlawk an hmang ta a ni.

Second half-ah Chawnpui FC chuan nawr nghalin an siphurh sutna hun tha vawi hnih an nei a, box pawn chiah atanga Lalremruata pet tha zet chu Electric Veng FC keeper Muansanga'n a dan sak hnuah bench atanga lut Larry Lalrinawma chuan goal kham chungah chiah apet zui bawk.

Goal luh belh tawh lo in Electric Veng FC chuan 2-1 in hnehna an chang mai dawn emaw tih hnu huntawp dawn minute 6 ala awmin bench atanga lut David Lalchhuanawma chuan box pawn chiah atangin an chak nem nghehna goal a khung. Electric Veng FC chuan 3-1in hnehna an chang zui ta a ni.

Chawnpui FC hian October ni 8, Thawhlehni tlai dar 4:00-ah kai thar FC Venghnuai an hmachhawn ang a, October ni 9, Nilaini zan dar 7:00-ah Electric Veng hian Chhinga Veng FC an hmachhawn ang.

(adsbygoogle = window.adsbygoogle || []).push({});