November ni 14, Nilaini zan Mc Dowell's No 1 Soda Mizoram Premier League (MPL) Season 7 Round 13 match hnuhnung ber Electric Veng FC leh Chawnpui FC inkhelah Electric Veng FC chuan sihnih faiin Chawnpui FC an hneh a, point thum an hlawh chhuak. He inkhelah hian Electric Veng FC defender Vanlalremruata chu Man of the match-ah thlan a ni.
Team pahnih te hi round 3-ah inhmachhawn tawhin goal awmlo in an inhneh tawk a, an intawn vawihnihnaah erawh Electric Veng an chungnung zawk a ni. Electric Veng hian point 20 neiin table-ah pathumna an ni a, semifinal khel turin an dinhmun an sawh nghet ta a ni. Chawnpui hian point 14 neiin table-ah parukna an ni a, an tan semifinal khelh beiseina a awm tawh lo.
07:00 PM Electric Veng FC 2-0 Chawnpui FC
(R Lalthanmawia 15', Vanlalremsanga 26')
MoM: Vanlalremruata, Electric Veng FC
Goal lut te hi first half-a lut ve ve an ni a, Electric Veng FC tan R. Lalthanmawia leh Vanlalremsanga chuan goal khat ve ve an khung. Goal hmasa ber hi inkhelh tan a tang a minute 15-ah a lut a, Chawnpui keeper Thomas Lalthlamuana ball pet sual chu Electric Veng forward R. Lalthanmawia chuan nangchinin a khung. Chawnpui pawhin an siphurh sutna hun tha neiin box chhung chiah a tang a Vanlalthanga leh K. Roluahpuia shot tha zet chu Electric Veng keeper Nunga Hnamte chuan a dan sak.
Electric Veng chuan minute 26-ah an hun tha neih hmang tangkai leh in box pawn veilam sir a tang a, Vanlalremruata ball pek tha zet chu box chhunga awm Vanlalremsanga chuan chiang zet a pet lutin an goal hnihna a khung.
First half huntawp dawnah Chawnpui chuan goal thunna hun neiin K. Roluahpuia chuan Electric Veng keeper Nunga Hnamte chiah a hmachhawn hnuaah Nunga Hnamte chuan a dan sak a, goal luh belh lo in chawlhlawk an hmang zui ta a ni.
Second half tan a ni a, Chawnpui chuan nawr nghalin goal thunna hun tha annei nghal. Bench a tang a lut Lianzama leh Jerry F. Zonunsanga chuan an hun tha neih an hmang tangkai thei lo a, K. Roluahpuia shot tha zet chu a goal dawn nia alan laiin goal kham chungah chiah a kal.
Huntawp dawnah buaina te nau a chhuak a, Chawnpui forward David Laltlansanga chu hnawh chhuah zui a ni a, goal luh belh tawh lo in Electric Veng chuan 2-0 in hnehna an chang ta a ni
(adsbygoogle = window.adsbygoogle || []).push({});