Mc Dowell's No 1 Soda Mizoram Premier League (MPL) Season 7 round 4 September ni 25, Thawhlehni zan kai thar Electric Veng FC leh Chanmari FC inkhelah Electric Veng FC chuan 3-1 in Chanmari FC an hneh a, he inkhelah hian Electric Veng FC midfielder Isaak Vanlalpeka chu Man of the match-ah thlan a ni.
Electric Veng FC tan Isaak Vanlalpeka chuan goal hnih khungin David Lalchhuanawma chuan goal khat a khung. Chanmari FC tan Lalnunzama chuan goal khat a khung ve bawk. Electric Veng FC hian I League club Aizawl FC leh Mizoram Police FC an hneh hnuah kai thar ve bawk Chawnpui FC an draw a, Chanmari FC hneh leh in point 10 an nei tawh a, Chanmari FC hian Ramhlun North FC an hneh hnuah Aizawl FC an draw a, Bethlehem Vengthlang FC hnehin Electric Veng FC an hneh lo leh a, point 7 an nei mek a ni.
07:00 PM Electric Veng FC 3-1 Chanmari FC
(Isaak Vanlalpeka 45+1', 72', David Lalchhuanawma 90+7) (Lalnunzama 86')
MoM: Isaak Vanlalpela, Electric Veng FC
Inkhel tan a ni a, Chanmari FC chuan inkhel thunun zawkin Dampuia chuan goal thunna hun tha nei nghal mahse goal zawnah a pet lo a, Vanlalbia Chhangte goal shot tha zet chu Electric Veng FC keeper Nunga Hnamte chuan a dan sak zui a, Lalnunzama pawhin goal thunna hun tha a neih chu a hmang tangkai thei lo bawk.
Electric Veng FC pawhin nawr let ve bawkin David Lalchhuanawma, Remsanga leh Vanlalhmuchhuaka ten hunawl an nei thei bik lo. Goal lut lo in chawlh lawk an hmang dawn emaw tih hnu huntawp dawn injury time-ah Electric Veng FC tan free kick atangin Isaak Vanlalpeka chuan goal hmahruaina a khung a, chawlh lawk an hmang zui ta a ni.
Second half-ah Chanmari FC chuan nawr nghalin Rochhingpuia chuan an siphurh sutna hun tha nei mahse Electric Veng FC keeper Nunga Hnamte tan hna hautak a siam lo a, minute 68-ah Chanmari FC defender Rosanga hnawhchhuah a ni. Minute 72-ah Electric Veng FC chuan an hun tha neih hmang tangkaiin Vanlalremkima (Tetea) freekick tha zet chu box chhunga awm Isaak Vanlalpeka chuan chiang zet a pet goal-in an goal hnihna a khung.
Chanmari FC an beidawng lo. Goal thun ngei tumin an nawr let a, minute 86-ah mual veilam a tang a Muanzova ball vawrh luh tha zet chu box chhunga awm Nunzama chuan mawi tak a chhuih goal-in an goal khatna a khung. Chanmari FC chuan an nawr chhunzawm a, an siphurh sutna hun tha nei mahse goal an thun thei lo. Electric Veng FC chuan huntawp dawn injury time-ah an hun tha neih hmang tangkaiin forward David Lalchhuanawma chuan goal a khung zui leh a, 3-1 in hnehna an chang zui ta a ni.
(adsbygoogle = window.adsbygoogle || []).push({});