04 May 2018 10:12

inkhel

El Clasico behbawm thenkhat

Pathianni zanah khawvela football khelah chuan nghahhlelh hlawh ber leh entu tam ber pawl, El Clasico chu en tur a awm leh dawn a. Real Madrid chuan Camp Nou-ah an hmelma Barcelona an luhchilh dawn a, zan dar 12:15 ah an inkhel tan ang.

El Clasico hi eng sawina nge a nih tih chu football ngainatute chuan kan chiang tlang tawh hlawm viauin a rinawm a, a awmzia bakah a behbawm tlem han thai lang thar ila.

El Clasico chu:
A tir takah chuan Spanish club lian pahnih - Real Madrid leh Barcelona te La Liga bika an inkhel sawina a ni thin a, mahse hun a lo kal zel a, inelna chi hrang hrang - UEFA Champions League, Copa del Rey tih vela an inkhel sawina atan pawh hman a ni ta vek a ni.

Anni pahnih inkhel tur hi chu football ngainatute ngaihven hlawh loh lai a nei lo a, UEFA Champions League final tih lohah chuan khelmual chhunga hmelma kumhlun inbei a ni bawk a, inkhel entu ngah ber pawl leh ngaihven hlawh ber pawl a la ni chho zel a ni.

A bul tanna:
Spain ramah chuan Madrid leh Barcelona te chu khawpui lian berte an ni a, tunhma atangin an iner thei hle a, politics thlengin inngeih lohna lian tak an nei chho fo a. Real Madrid hi Spanish nationalism aiawhtu anga ngaihna a lian a, chutiang deuh bawkin Barcelona hi Catalan nationalism awiawhtu niin an ngai deuh bawk a, hei vang hian inhmelmakna hi a sosang ta viau reng a ni.

Anni pahnih inhalna hi 1902 vel daih atanga intan tawh a ni a, King Alfonso XIII pualin tournament an buatsaih a, Real Madrid leh Barcelona te hi an inkhel a, hei hi an intawn hmasak ber a ni a. Khawvel infiamna huangah chuan club inhal berte zinga mi an ni a, heng avang te hian hlut pawh an hlawh phah lehzual niin a lang a. 2014 khan Forbes chuan khawvela football club hlu ber pahnihah an puang hial a ni.

A behbawm:
El Clasico hi khawvel hmun hrang hrangah an en nasa thei hle a, an inkhel entu hi mi maktaduai telin an en ziah a. Real Madrid chu anni pahnih inkhelah hian an chak ngun zawk a, a vaiin vawi 270 an inkhel tawh a, heng zinga match 236 hi competitive match niin, vawi 34 chu exhibition match a ni thung.

Competitive match bikah chuan Real Madrid hi vawi 95 an chak tawh a, Barcelona hi vawi 92 an chak ve tawh bawk a. An inkhelh tawh zawng zawngah chuan Barcelona hi vawi 112 an chak tawh a, Real Madrid hi vawi 99 an chak ve tawh bawk a. An inkhelh tawhah vawi 58 chu an inhnehtawk bawk.

1950 chho khan Argentine footballer ropui Alfredo di Stefano chu a khelhna club Millonarios Fútbol Club tihsual vangin Real Madrid leh Barcelona chuan an ziaklut ve ve a. Hetiang a nih takah chuan Spanish Federation chuan rem an ruat a, Di Stefano chuan Spain ah seaon 4 a khel ang a, Real Madrid leh Barcelona ah hian season 2 ve ve khel turin an ti a, fans te thin a rim phah hle.

Hemi hnu hian heng club pahniha khel dun player an awm chho ta nual a. 2000 khan kum 5 zet Barcelona lama a khelh hnuah Luis Figo chuan Camp Nou chhuahsanin Santiago Bernabéu a pan a. 1996 khan Luis Enrique chuan Real Madrid lama season 5 a hman hnuin an hmelma Barcelona hi a pan bawk a. Anni pahnih inkara player an inleitir hnuhnun ber chu Javier Saviola (2007) a ni.

Brazilian striker ropui Ronaldo khan 1996-97 season kha Barcelona-ah a khel a, 1997 khan Inter Milan chu khatih laia world record siamin $27 million zetin a zawm a. 2002 khan Los Blancos a zawm leh a, Zinedine Zidane, Luis Figo, Roberto Carlos, Raúl leh David Beckham te nen Florentino Perez chu khawvela football team ropui ber Galácticos an dinpui a ni.

Real Madrid leh FC Barcelona tana khel kawp zingah Gheorghe Hagi, Samuel Eto’o leh Javier Saviola te pawh an tel a, anni club pahnih inkarah player hi vawi 33 an inleisak tawh.

El Clasico bikah Lionel Messi chu goal khung hnem tawh ber a ni a, goal 21 a khung tawh a. Di Stefano (18), Cristiano Ronaldo (16) leh Raul (15) te chu a dawttu an ni a. Messi bawk hi assist ngah ber (13) leh hattrick siam ngun ber (2) a ni bawk.

Barcelona tantu chu Culé emaw Barcelonista emaw an ti thin a, an team pawh Barça emaw Blaugrana emaw an ti thin. Real Madrid fans pawh Merengues emaw Madridistas emaw an ti a, an player te chu Blancos leh Galácticos tia hriat an ni.