Manchester United chuan UEFA Europa League semi final-ah AS Roma chu 8-5 ngawtin an hneh a, hengah hian Edinson Cavani a langsar hle a, goal 4 a thun bakah mi goal thun tur vawi 2 a siamsak a ni.
First leg-ah Edinson Cavani chu a langsar viau mai a, Manchester United chu 6-2 in a chakpui phawt a. Second leg-ah pawh goal hnih a thun a, 2-3 in chak lo mahse chawh rualin an chak a, final an lut thei ta tho a ni.
Edinson Cavani hian Old Trafford-ah Manchester United chu hma a hruaipui a, Bruno Fernandes goal thun tur a siamsak a. Second half-ah amah hian goal hnih a thun zui a, Mason Greenwood goal thun tur a siamsak zui bawk a. Rome khawpuiah Cavani hian goal hnih chu a thun leh bawk a ni.
Tun season chhungin Uruguay striker Cavani hian inelna hrang hrangah game 34 chu a khel tawh a, hengah hian goal 14 lai a thun thei a. Premier League bikah chuan goal 8 a thun tling tawh a, Europa League lamah goal 5 a thun tawh bawk a. Carabao Cup ah goal 1 chu a thun bawk a ni.
Season kal mekah mi goal thun tur vawi 4 chu a siamsak tawh a, Premier League lamah mi goal thun tur vawi hnih a siamsak a, Europa League lamah mi goal thun tur vawi hnih bawk a siamsak tawh a ni.
Cavani hi tun hnuah Europe khawmualpuia football hmanga inelna semi final first leg leh second leg-a goal hnih emaw, a aia tam emaw thun ve ve thei hmasa ber niin, hetianga ti thei hnuhnung ber chu Klaus Allofs niin, 1985-86 UEFA Cup ah khan Cologne tan KSV Waregem lakah a lo thun tawh a ni.
UEFA Europa League game 15 a khelh hnuhnunah Cavani hian goal 16 a thun tling ta chiah a, bul a tan hnuhnun 10 ah heng goal 15 te hi a thun a ni.
AS Roma nen semi final-a an inkhelh khan Cavani chu goal 6 ah a inhnamhnawih a, amah hian goal 4 a thun a, mi goal thun tur vawi 2 a siamsak a. Europa League semi final bikah Cavani hi goal 4 aia tam thun thei pathumna a ni a, a hmain Radamel Falcao (2011) leh Pierre-Emerick Aubameyang (2019) te chuan an lo thun tawh a ni.
Edinson Cavani hian October 5, 2020 ah khan kum khat chhung atan Manchester United hi a zawm a, an duh a nih chuan kum khat chhung atan a contract pawh sei theih turin thuthlung an ziak a ni.