Bournemouth manager Eddie Howe chuan chhuak turin club  nen inremna an neih hnuah Bournemouth a chhuahsan tih Bournemouth chuan an puang.

Howe hian Bournemouth hi tun Premier League season khelh zawh takah khan a relegate puia, Championship lamah Bournemouth enkawl chhunzawm zel dawn lovin, Premier League lamah kan hmuh ngei a beiseiawm hle.

Howe chuan Bournemouth a chhuahsan chungchang sawiin, “Payer ang leh manager angin Bournemouth tan hian kum 25 zet hun ka lo hman hnuah, tuna ka thutlukna hi ka thutluknaa siam harsa ka tih ber a ni. Tun hi he club tan kawng dik tak zawh hun a ni,” a ti.

Kum 42 mi Howe hi footballer hlui niin, Bournemouth academy chhuak a ni a, kum 2008 khan a hma kuma inkhelh a chawlhsan hnuah Bournemouth hi a enkawl tana, kum 2011 khan chhuahsanin, Burnley a enkawl zuaia, kum 2012 khan Bournemouth chuan an ruai nawn leh.

Manager angin Bournemouth hi Howe hian tum hnih a enkawla, hemi hun chhung hian game 450 chuang lai a khelhpui hman.

Howe-a’n Bournemouth a enkawl tirh hian Cherries hi League Two-ah an la awmin, Howe hian League One-ah kaipuiin, Championship-ah a kaipui leha, Championship atang hian kum 2015 khan Premier League-ah kaipui lehin, kum 6 chhungin vawi thum ngawt Bournemouth hi league sang zawkah a kaipui.

Kum nga zet Premier League-ah Bournemouth a champui hnuah tun season khelh zawh takah khan a relegate puia, a chhuahsan zui ta bawk. Season khelh zawh takah khan Bournemouth hian point 34 hmu in, 18-naah an awma, vawi 22 chak lovin, vawi 7 an tumpuite an inhnehtawkpuia, vawi 9 hnehna an chang.

Howe hian manager angin mimal chawimawina thahnem tak a lo dawng tawha, Football League Manager of the Decade Award (2005-2015) pawh dawng tawhin, LMA Manager of the Year pawh kum 2015 khan a lo dawng tawh a ni.