Eastbourne title latu Caroline Wozniacki

01st July 2018, 02:07AM

World number two Caroline Wozniacki chuan Aryna Sabalenka hnehin a vawi hnihna atan Eastbourne title a la leh ta.

Danish top seed Wozniacki leh Belarusian star, world no. 45 Sabalenka te chu Nature Valley International final-ah an inhmachhawn a. He inkhelah hian Caroline Wozniacki hi 7-5, 7-6 (7-5) in a chak a, he title hi a vawi hnihna atan a la leh a ni.

Kum 27-a upa Wozniacki hian inkhel hi a thunun zawk a, kuminah title pahnih a lakna niin, Australian Open-ah a lo champion tawh bawk a. Wimbledon tan hma ni hnih chauh la awmin title hi a la a, 2016 Wimbledon finalist Angelique Kerber bakah Nottingham Open champion Ashleigh Barty te chu hnehin Eastbourne title hi a la a ni.

Kum 20-a upa Sabalenka hian a khel chhe lem lo hlle a, mahse a tawpah chuan a dingchang zawkah a tang thei ta lo a. Nikuma world no. 135 ni thin hi Eastbourne ah hian a tel hmasak ber tum a ni a, final a thleng nghal thei a. Wimbledon-ah Romanian Mihaela Buzarnescu nen an inkhel dawn a. Wozniacki hian American Varvara Lepchenko a hmachhawn dawn bawk a ni.

Caroline Wozniacki chuan, “Helai hmunah hian hun rei tawh takah khan title ka lo la tawh a, title ka lak atanga kum 10 hnuah pawh ka la tel thei hi lawmawm ka ti lehzual,” tiin a sawi.

Copyright © inkhel.com 2024. All rights reserved.