Manchester United chuan thu chhuah siamin East Bengal nen inkhel thei tur anga thawm awm chungchangah engmah thutlukna siam fumfe a la awm loh thu an tarlang.
East Bengal chuan a hma deuhin an club kum 100 tlin lawmna leh Manchester United in season thar atana an inbuatsaihna ni pahfawmin club pahnihte hi Kolkata khawpuia Salt Lake Stadium-ah an inkhel dawn niin an sawi a. Hemi chungchang hi Premier League club chuan an rawn sawi fiah ve thung a ni.
Greig Mailer, Manchester United Corporate Communications Manager chuan IANS hnenah, “2020 chhunga kan hun hman dan tur chungchang hi engmah chiang taka ruahman a la ni lo a, thutlukna fumfe tak kan la siam lo a. Hetiang hi kan dinhmun a nih avangin East Bengal nen inhmachhawn tur anga an sawi pawh engmah chiang a la awm rih lo,” a ti.
“Kan club tana ruahmanna kan siam fel hunah chuan mumal takin kan puangzar vek dawn a, hriat fuh loh a awm thei lo turah kan ngai,” a ti bawk.
East Bengal mi leh sate chuan Manchester United nen inkhel thei an nih thu hi an lo sawi chhuak tawh a, engtik hunah nge inkhel tura ruahmanna an siam tih erawh an la puang chhuak bik lo a ni.
“Manchester United hian East Bengal nen inkhelh chungchangah an inhawn thu an sawi tawh a; amaherawhchu, hetiang thil thlentir thei tur chuan sum tam tham tak mai a kaihhnawih tel a ngai a, hei vang hian thil a tih zung zung theih dawn loh a. Pawisa hi vawi hniha pek tlak tur a ni dawn a, hei vang hian a hun tur pawh sawi chian theih a la ni chiah lo a ni,” tiin hre chiangtu inti pakhat chuan a sawi.
“March thla hma lamah chuan engmah sawi chian theih a awm dawn lo a, chutih rualin theihtawp kan chhuah ang a, a tak ram thlen theih ngei kan tum dawn a. Manchester United team hi Kolkata khawpuia an rawn kal a nih ngat chuan first team ngei hi an rawn kal ang,” a ti bawk.
Nikum November thlaah khan Manchester United aiawh mi palite chu Kolkata khawpuiah hian an kal a, hemi tumah hian sports minister Aroop Biswas chu Nabanna-ah an hmu a. Manchester United director of football Allan John Dawson, director of tours and friendlies Christoffer Laurens Komen te bakah club official dang pahnih Philip Malcolm Smith leh Matthew Charles Jones te chu Kolkata khawpuia rawn kalte chu an ni.
Manchester United aiawhte hian Salt Lake Stadium chu an tlawh a, stadium chu an enfiah hnuah an lung a awi thu sawiin, inkhelhna atan pawha zahpuiawm lo nia an ngaih thu an sawi a ni.
An inkhel thei ta a nih chuan East Bengal kum 100 tlin lawmna peng pakhata telh a ni ang a, Manchester United in pre-season Asia tour an neih peng pakhat a ni dawn bawk a ni.