East Bengal Football Club chuan Bengaluru khawpuiah FC Barcelona aiawhte chu an bia a, club pahnihte hian thawh dunna thuthlung ziah tumin hma an la mek a ni.

Indian club hlun East Bengal leh Spanish club lian Barcelona te hian inremna thuthlung ziah dan an ngaihtuah dun mek a, East Bengal chairman Ajit Isaac chuan, “Spanish club ropui FC Barcelona aiawhte leh Quess East Bengal Football Club aiawhte chu an inbe tawh a, club pahnihte inzawm theih dan turte an sawiho a ni,” a ti.

2018-19 season-ah East Bengal chuan I-League title an la teuh hle a, a tawpah Chennai City FC chu an champion a, East Bengal hi pahnihna an ni a. Kolkata club lian hian hun lo awm zel tura I-League lama Spanish footballer tam zawk lak luh theih an tum a ni.

East Bengal manager hi a hmain Real Madrid academy coach a ni thin a, tun hnaiah Kolkata club tan hian Alejandro Menendez chuan kum hnih chhung chu contract a ziak thar leh a. Season thar tan leh hma ngeiin Spanish player lak luh hman hi an tum hle a ni.

2016 ah khan East Bengal chuan FC Barcelona hmelma kumhlun Real Madrid an lo dawr tawh bawk a, academy chungchangte an sawipui a, mahse a tawpah an inrem hleithei ta lo a, an thawkho ta lo a ni.

Thla hmasa khan East Bengal bakah I-League club dang parukte chu Super Cup atangin an inhnukdawk a, All India Football Federation chuan club ho chet dan chu duh loin show-cause notice an pe hlawm a ni.