17 Apr 2018 02:44

inkhel

East Bengal in Super Cup final an lut

East Bengal tan Dudu Omegbemi chuan goal thunin FC Goa chu 1-0 in an hneh a, Super Cup final an lut.

Kolkata club coach Khalid Jamil chuan 4-5-1 formation hmangin a naute chu a khelhtir a, striker Dudu chu a maltlat a, Uganda midfielder Khalid Aucho pawhin a tir atangin a khel ve a, bul a tan ve hmasak ber a ni.

FC Goa coach Derick Pereira chuan 4-4-2 formation a hmang thung a, tlar hma berah Manvir Singh leh Spaniard player Ferran Corominas an inkawp a ni.

Kalinga Stadium-a inkhelah hian goal a lut thei lo hle a, first half chhung zawngin innawr tawn mahse khawi lam mah hian goal an thun thei lo a. Minute 19-ah East Bengal chuan hun tha an nei a, Syrian midfielder Mahmoud Al Amna chuan Japanese midfielder Katsumi Yusa ball pek chu a lo thun thelh hlauh a, hma hruai theihna hun tha a bawhpelh.

Hemi hnu hian Dudu pawhin Al Amna ball vawrh phei chu a lo tauh pial a, mahse Goa goalkeeper Kattimani zawnah tak a ni a, Kattimani hian a lo man vat a.

Katsumi hian minute 33 leh 35-ah hun tha a bawhpelh leh a, Goa pawhin half time dawnah hun tha deuh an nei a, Coro chuan ball a khalh phei a, East Bengal goalie Ubaid chu a pal tlang thei ta lo a, half time thlengin 0-0 a ni.

Second half an khelh leh hnuah pawh an innawr tawn reng a, East Bengal hi an hlauhawm zawk a, goal thun ngei tumin tan an la hle a. Dudu leh Katsumi chuan goal thun theihna hun an neih chu an hmang tangkai thei lo zel.

Minute 78-ah Katsumi chuan veilam sir atangin Goa goal lamah ball a vawrh phei a, hei hi Dudu chuan awlsam deuhin Kattimani man hman lohin a lo thun a, he goal hmang hian East Bengal chu a chakpui ta a ni.