Lalthuammawia Ralte chuan season tharah I-League a khel dawn a, Kolkata club lian East Bengal a zawm dawn.

Goalkeeper Lalthuammawia Ralte hi 2018-19 season chhung khan FC Goa ah a awm a, player la upa lo tak Mohammed Nawaz chuan first team-ah hmun a chan deuh chawt avangin kumin January thlaah khan loan-in Kerala Blasters a zawm a ni.

2011 kumah khan Lalthuammawia hian Shillong Lajong FC chu Federation Cup semi final a luhpui a. 2014 ah khan Bengaluru FC a zawm a, a club thara season a hman hmasak berah hian game 20 a khel a, Blues chu I-League title a lakpui nghal a, hetiang dinhmuna an din theihnaa player pawimawh ber pawl a ni.

February 4, 2015 ah khan Mawia chuan a vawi khatna atan AFC Champions League game a khel ve a, Malaysia rama Larkin Stadium-ah Johor Darul Ta’zim a hmachhawn a. Hemi hnu, 2015 Indian Super League club North East United FC chu loan-in a zawm leh a, substitute bench-ah hun a hmang tluanchhuak zui a ni.

Kerala Blasters a zawm hnuah pawh Thuammawia hian khelhna hmun a chang thei meuh lo a, vawi hnih chiah bul a tan ve a. Mizo goalkeeper hian khelh tam theihna hmun a zawng chho ve zel a, hetianga a hawi kual lai hian East Bengal chuan thuthlung an ziahpui ve leh ta a ni.

East Bengal hi player lei chungchangah an buai chho viau a, a hmain Naorem Tondomba Singh leh Pintu Mahata te chu an la lut a, an hmelma lian Mohun Bagan atangin Abhishek Ambekar an la tawh bawk a. Jaime Santos chuan Red and Gold ah hian 2021 thleng awm zui turin contract a ziak thar a, Kassim Aidara pawhin a contract chu kum khat atan a pawt sei bawk a ni.