Brandon Vanlalremdika chuan East Bengal chhuahsan a la tum rih lo a, kum hnih daih tur contract a ziak thar leh chiah a ni.

East Bengal chuan thuchhuah siamin, “Quess East Bengal FC chuan Brandon Vanlalremdika chu season hnih chhung atan lawm takin contract kan ziahpui leh ta tih hi kan puang duh a ni,” an ti.

Mizo midfielder Brandon Vanlalremdika chuan, “Contract thar ka ziak leh thei hi lawmawm ka ti a, Quess East Bengal FC tana ka khel thei hi ropui ka ti a, hun rei tak an hnena ka awm zel theih ka beisei,” tiin a sawi.

Brandon hian East Bengal chu I-League ah pahnihna a nihpui thei a, coach Alejandro Menendez hnuaiah player pawimawh ber pawl a ni thei bawk a ni.

2015-2017 chhung khan Brandon hian Aizawl FC ah a khel thin a, game 25 khelhah goal 4 a thun a. 2017 atangin East Bengal hi a zawm ve leh a, tun thlengin game 28 a khel tawh a, goal 2 chu a thun tawh a ni.

Season hman zawh takah khan Brandon hi Laldanmawia Ralte nen an tangkai dun hle a, East Bengal player langsar zual zingah an tel pha ve ve a, anni hian midfield lamah ro an rel nasa hle.

East Bengal chu I-League season zo taah khan pahnihna niin, champion Chennai City FC kha a tawp niah an pha ta lo a, game 20 khelhah point 42 an hmu tling a ni.