Valeriy Lobanovskyi Dynamo Stadium-ah Manchester City chuan 3-1 in hnehna an chang a, Champions League last 16 1st leg away-a hnehna an chan avangin City hian quarter final lut turin chance tha tak an nei ta a ni.
Manchester City tan Aguero, Silva leh Toure ten goal an khung a, FC Dynamo Kyiv tan Buyalskiy chuan goal khat a khung bawk a ni. Manchester City manager Pellegrini chuan FA Cup fifth round match-ah a player engemaw zat a hahchawlh tir, hei vang hian Chelsea lakah 5-1 laiin an tlawm a nih kha. Mahse Champions League match-ah erawh ropui takin an khelh theih phah ta a ni.
Dynamo Kyiv 1-3 Manchester City
(Buyalskiy 59') (Aguero 15', Silva 40', Toure 90')
Dynamo Kyiv XI: Shovkovskiy (C), Danilo Silva, Dragovic, Vida, Khacheridi, Rybalka, Garmash, Gonzalez, Buyalskiy, Yarmolenko, Teodorczyk
Manchester City XI: Hart, Sagna, Kompany (C), Otamendi, Clichy, Fernando, Fernandinho, Toure, Silva, Sterling, Aguero
Inkhelh tan tirah mual neitu Dynamo Kyiv chuan chance an nei nghal a, Andriy Yarmolenko shot chu Hart chuan dangin, hemi per hian Man City goal bar a per. Hei bak chu first half-ah Kiev hian chance tha an nei tawh lo.
Goal hmasa ber hi 15 mins-a lut a ni a, Silva corner pet tha zet chu far post-a lo chang Yaya Toure chuan Aguero tan a tauh thla a, Aguero chuan a chest hnuah leia a tlak hmain chiang set sawtin hnai tak atangin a volley goal ta a. Tun season-ah Man City tan goal 19 a khung tling ta a ni.
Goal hnihna hi first half tawp dawna lut a ni a, box veilam sirah Aguero chuan ball a chawk kawi a, Sterling-a tan pein, Sterling hian a tlanluhpui hnuah lei hrulah a cross a, box dinglama lo chang Silva chuan awlsam takin a pet goal ta a ni.
First half-ah hian Man City an khel thain an chungnung hle a, Aguero chuan hattrick siam theihna khawp chance tha a hmu a, Yaya Toure pawhin goal khungna chance tha zet nei mahse Kyiv goalkeeper Shovkovskiy chuan a lo dan sak a ni.
Second half-ah Dynamo Kyiv chuan na takin an nawr a, Man City tlar hnung an tal buai zauh zauh, 59 mins-ah goal an khung ve ta nge nge a, Otamendi tauh per chu Buyalskiy chuan box sir atangin kawh zetin a pet a, hei hi Otamendi chuan dangkawiin, Manchester City goal-ah a lut, Dynamo Kyiv chuan goal khat an khung.
Hemi hnu hian Buyalskiy chuan an si phurh rulhna chance tha zet a nei leh a, box chhung atanga a shot chu Manchester City goalkeeper Hart chuan a lo dang hman hlauh a. Yaya Toure chuan Sterling-a cross a tauh goal theih loh hnuah 90 mins-ah goal ropui a khung a.
Box pawn atanga a thuai tha zet chu mawi zetin goalkeeper dinglamah a thlawk lut a. 3-1 in Manchester City chuan hnehna an chang a, a vawi khat nan Champions League quarter final lut turin dinhmun tha takah an ding mek a ni.
Manchester City hian Capital One Cup final an lut tawh a, Premier League-ah champion beiseina an la nei chhunzawm zel. Chutih laiin FA Cup nen Champions League nen an inpawt buai hle dawn tih an inhriat vang ni tur a ni, weekend liamta khan FA Cup Fifth Round-ah Pellegrini chuan tlak pawisa lovin a player tha a dahtha nual.
Match khelh tur tam lutuk chuan season tawpah an chet that loh a hlau ni ngei tur a ni, FA Cup atangin an intitla lui? ni berin a lang. Champions League quarter final lut turin dinhmun tha takah an ding mek a, Etihad Stadium-ah Kyiv hian an lehthal a rinawm em em loh. Pellegrini hian City-a a hun hnuhnungah hian UCL title lak ngei a tum niin a lang.