Argentine player thawm ngah tak Paulo Dybala manah Tottenham leh Juventus-te chu an inrem tawh niin Sky Italia chuan a tarlang.

Tottenham hian Juventus forward Dybala hi pound maktaduai 64.4 (euro maktaduai 70) in an dawra hei Juventus lam chuan an lo pawm niin Sky Italia hian a tarlanga, Dybala hian Tottenham a zawm duh leh duh lovah a innghat tawh niin a lang.

Thla hmasa khan Tottenham hian Dybala hi an lo ngaihven tawh tih Sky Sports chuan a tarlang a, mahse Christian Eriksen leh Danny Rose-te hmalam hun a la chian loh avangin mumal takin indawrna an kalpui lo niin tarlan a ni.

Tottenham midfielder Eriksen chuan Spurs chhuahsanin Manchester United a zawm mai a rinawm a, Rose pawh hi a chhuak ngei dawn niin a lang tawh; hemi avang hian Spurs hian Dybala hi an dawr ta niin a langa, bazar hun a tlem tawh avangin vawiin lam hian a lakluh tur leh lakluh loh tur chu a chian a rinawm viau.

United chuan Dybala hi an lalut teuh hle a, mahse mimal thilah Dybala leh United-te hi an inrem theih loh avangin United chuan an bansana, Eriksen-a lam hawiin, Tottenham hian Dybala lam an hawi ve thung.

Premier League club te bazar theih hun chhung a tawp tep tawh a, ni hnih pawh a awm tling tawh lova, club tinten an player mamawh an fawm khawm mawlh mawlh chho tan nasa lehzual dawn niin a lang a ni.