16 Sep 2020 07:52

bakteaJr.

Mizo tlangval

​Dutch player te avangin United inkhel ka en thin: Van de Beek

Manchester United midfielder thar Donny van de Beek chuan, Dutch player an awm thin avangin a naupan tet atangin United inkhel a en thin thu a sawi.

Dutch midfielder Van de Beek hi United chuan tun thla tir khan Ajax atangin an lei a, a manah add-ons zawng zawng nen pound maktaduai 40 dawn an senga, kum 2025 June thla thleng contract an ziahpui.

Old Trafford-ah hian Dutch player kan lo hmu fo tawh thina, hlawhtling tak tak te ni hlawmin, Robin van Persie, Edwin van der Sar leh Ruud van Nistelrooy te bakah, Ajax lama Van de Beek-a team mate thin Daley Blind-te chu a langsar zual an ni.

Van de Beek chuan, “Ka naupan lai atangin United inkhel hi ka en nasa thina, a chhan chu Dutch player an neih thin vang a ni. Naupan lai kha chuan Dutch player an awm avang khan en kha a nuam bik em em thin. Daley, Edwin, Robin van Persei leh midang te kha ka en thina, United-ah title tam tak an hlawhchhuaka, football mawi tak United khan an khel thina, an hmuhnawm ka ti thin hle a ni,” a ti.

Van de Beek hian United tan friendly game pakhat a khel tawha, United player te bula khelh chungchang sawi zuiin, “Heng ang player te bula khelh hi a nuam em em a, an vai hnen atang hian zir tur tam tak a awm. Ka khelhpui thei hi ka lawma, ka thil duh pawh a ni a, he club-ah hian hma hun eng tak kan neih ho ka beisei. Player naupang, ka rualpui an tam hle a, hetiang avang te hian ka tan team puihna hun tha a inhawng zau hle in ka hria a ni,” a ti.