16 May 2019 09:47

bakteaJr.

Mizo tlangval

Dutch league-ah Ajax an champion

Dutch league, Eredivisie khelh zawh a ni a, Ajax chu champion-in kum 2013-14 season hnuah an vawi khat champion lehna a ni.

Dutch league-ah hian team 18 an awm avangin season khatah khelh 34 a awm a, season tawp niah Ajax hian point khat chiah mamawh tawh mahse nuamsa taka chakin point thum an hlawhchhuaka, season li an champion tawh loh hnuah Eredivisie title an la leh ta a ni.

Season tluanin champion lai PSV Eindhoven leh Ajax –te hi an inuma, tun thla tir mai pawh khan an point hmuhzat a la inang chiah. Mahse chesual ve duh lo Ajax chu season a zawh meuh chuan point thumin an sang zawk.

Season tluanin Ajax hi vawi li an tlawma, vawi hnih an tumpuite inhnehtawkpuiin vawi 28 an chak bawk. Ajax hian khelh 34-ah goal 119 lai an khunga, point 86 an hlawhchhuak thei.

Season khar niah hian Ajax chuan De Graafschap tlawhin, 4-1 in Ajax hi an chaka, Ajax tan Lasse Schone leh Nicolas Tagliafico-te chuan goal khat ve ve khungin Dusan Tadic chuan goal hnih a khungam Tadic-a goal hmasa zawk hi penalty spot atanga a khung a ni. Mual neitu lam tan Youssef El Jebli chuan goal khat a khung ve bawk.

Pahnihnaah PSV awmin point thum an inthlau a, season tharah Ajax leh PSV-te chuan Champions League-ah Netherlands ai an awh dawn.

Ajax hian tun thla tir mai khan KNVB Cup final-ah Willem II chu si li fai laiin an hneha, an lo champion tawh bawk. Tun season-ah Ajax an che tha hle a, league title leh KNVB Cup-te chawiin, kum 17 hnuah a vawi khat nan season khat chhungin trophy lian pahnih an chawi leh a, Champions League lamah semi-final an lut bawk a ni.